111 Tranvías de Ferrol
- Provincia: A Coruña
- Concello: Ferrol, Serantes (incorporado a Ferrol en 1940), Narón e Neda
- Dirección: As Cocheiras, Freixeiro, Narón
- Coord. Xeográficas - Latitude: 43.50277191543947
- Coord.Xeográficas - Lonxitude: -8.191015720367432
- Coordeadas UTM: Huso 29 / X 565,39 / Y 4.816,99 (Cocheiras da compañía en Freixeiro, Narón)
- Clasificación: Transporte de viaxeiros e mercadorías
- CNAE: 49.31 Transporte terrestre urbano y suburbano de pasajeros
- Tipoloxía: Tranvías eléctricos
- Comarca: Ferrol
Tipo de propiedade:
Historia:
No ano 1830 comeza na
vila de Baltimore, nos Estados Unidos, o transporte público de viaxeiros nunhas
novidosas carruaxes que, tiradas por cabalos, se desprazan sobre uns raís planos,
sistema que alí deron en chamar tram-way
hippomobile. En 1832 xa funcionaba en Broadway (Nova York) malia que
presentaba o grave inconveniente da obstrución que supoñían as vías nas rúas. O
empresario francés Alphonse Loubat –que fixera a súa fortuna levando ós Estados
Unidos pes de viña de Burdeos e favorecendo a viticultura– melloraría o sistema
co raíl con carril (raíl en u), totalmente encaixado no chan, sistema que
patentaría á súa volta a Europa en 1852 co nome de “ferrocarril americano”, e que
en 1853 implantouse con grande éxito na devandita liña de Broadway, estendéndose
rapidamente por todo o país norteamericano.
Trala autorización do
goberno francés, o 21 de novembro de 1853 entraba en servizo en París unha
primeira liña de dous quilómetros con este sistema. El tramway da época era un vehículo rodante sobre carrís, pero aínda
tirado por cabalos; podía levar ata corenta e oito viaxeiros: dezaoito no
interior, vinte e catro sobre a imperial, e seis máis na plataforma reservada ós
fumadores.
A instalación dos tramway, anglicismo que por acó
remataría dando tranvía, progresou
con rapidez na Gran Bretaña (1860) e demais países europeos. En España
iniciarase en 1871 en Madrid e en 1872 en Barcelona, estendéndose tamén polo
resto do país. Para substituír á tracción animal ensaiaríanse diversos
sistemas, como o funicular, o de vapor ou o de aire comprimido; remataría por
impoñerse a tracción eléctrica, iniciada en 1881 por Werner Von Siemens en
Lichterfelde (Berlin) e en 1888 por Frank J. Sprague en Richmond (Virxinia,
EE.UU.).
No sistema de tracción
eléctrica a corrente producida na central lévase por un condutor aéreo, o
cable, e chega ó motor do carruaxe por medio de un contacto deslizante, o
trole, retornando á central polos carrís. O condutor varía a velocidade
mediante o regulador, e pode modificar o sentido da marcha accionando o
inversor. Co constante aumento da circulación rodada a meirande parte dos
tranvías foi substituída por autobuses, máis rápidos e de máis doada manobra.
En Galicia sábese que
houbo un primeiro tranvía de tracción animal entre Verín e Cabreiroá que sería
substituído por tracción de vapor en 1889 e desaparecería contra 1923. A Coruña
contaría cun tranvía de mulas dende 1903, convertido en eléctrico en 1913 e que
prestaría servizo deica 1962, ó que xa seguirían diversas liñas de tranvías
eléctricos por todo o país: Vigo (1914-1968), Vigo-Baiona (1914-1968),
Vigo-Porriño (1920-1967), Coruña-Sada (1923-1956), Pontevedra-Marín
(1924-1942), e Ferrol-Neda (1924-1961). Houbo despois algunhas liñas de
trolebuses que aproveitaron os cables dos tranvías: Pontevedra-Marín
(1943-1989), A Coruña (1948-1979), e A Coruña-Carballo (1950-1971).
Construcción:
Abandono:
Descrición:
Coa construción do
Arsenal de Ferrol, todo o contorno da ría experimentou a partires do século XVIII
un forte pulo demográfico e económico, acadando a vila ferrolá os 17.404
habitantes en 1857, tras Coruña (27.354 habitantes) e Santiago de Compostela
(26.938 habitantes), e moi por diante de Vigo (8.571 habitantes), a cuarta
cidade galega naqueles tempos.
Aínda a principios do
século XX, as comunicación da comarca ferrolá seguían a ser igual de precarias
que no resto de Galicia, especialmente nas conexións terrestres efectuadas por
medio de dilixencias e carruaxes arrastrados por cabalos ou mulas. O ferrocarril
Betanzos-Ferrol non entraría en servizo deica 1913, e o tramo de vía estreita
Ferrol-Mera ata 1964. As comunicacións marítimas tiñan mellor servizo, tanto no
interior da ría (A Cabana-Ferrol, A Graña-San Felipe-A Palma-Ferrol, Mugardos-A
Palma-San Felipe-Ferrol, O Seixo-Ferrol, Maniños-Ferrol, Barallobre-Ferrol,
Perlío-Ferrol, Xuvia-Ferrol) como nas conexión coa Coruña (desde 1850 unha hora
nos vapores de Nicasio Pérez).
Xa que logo, o tranvía
Ferrol-Neda ía ser un importante medio de comunicación ó longo de toda a marxe
dereita da ría, transportando no só persoas, senón tamén mercadorías (patacas,
peixe, galiñas, gando, madeira…).
A Gaceta do 16 de outubro
publicaba a Real Orde do 19 de setembro de 1914 pola que se aprobaba a
concesión por sesenta anos da explotación dun tranvía con motor eléctrico desde
Ferrol ata Santa María de Neda ó empresario coruñés don José Fernández
Solórzano y Freire, quen a tiña solicitada desde o ano 1904 e a cedería a don
Ubaldo Barcón Sandino xa o 22 de outubro do mesmo ano de 1914.
Trala oportuna captación
de capital, tanto na comarca ferrolá como entre a emigración (principalmente
cubana), constituíuse o primeiro día do mes de novembro de 1922 a empresa
“Tranvías de Ferrol, S.A.”, co seu proxecto dividido en tres tramos: da Porta Nova
ó Portádego de Xuvia; do Portádego de Xuvia a Neda; e da Porta Nova ó Peirao de
Ferrol.
Un dos principais
promotores do tranvía fora don Francisco Barcón Quevedo, quen comprara en 1873
a antiga fábrica de prancha de cobre de Xuvia para convertela nunha das
primeiras fábricas de liño e algodón de Galicia, e sería agora un dos seus
descendentes, o citado Ubaldo Barcón Sandino, quen, autorizado por Real Orde do
2 de agosto de 1923, aportaría a concesión á nova sociedade de tranvías.
A primeira liña prevista
no proxecto, desde a Porta Nova ata o Portádego de Xuvia, fora a única que
funcionou entre os anos 1924 e 1931. Xa no ano 1932 incorporaranse os traxectos
entre o Portádego de Xuvia e Neda, e entre a Porta Nova e o Peirao de Ferrol.
O percorrido da Porta
Nova ó Peirao tiña as paradas da Porta Nova, Rochel (cine Callao), Igrexa,
Mercado, Sagasta, Costa de Mella, Río Novo, Cuartel de Instrución e Peirao de
Curuxeiras. O regreso desandaba o recorrido ata a subida por Concepción Arenal
(na década de 1940 faríase por Rubalcava), para continuar pola Praza de Armas e
a rúa Real (San Benito) ata a Porta Nova. A distancia do traxecto da Porta Nova
ó Peirao de Ferrol era de 1.960 metros.
Aínda que houbo algunhas
modificacións ó longo do seu funcionamento, a ruta da Porta Nova a Neda tiña as
paradas da Porta Nova (con apartadoiro), O Inferniño (con apartadoiro),
Faxardo, San Xoán (con apartadoiro), A Gándara, A Ferrolana, Alto do Castaño,
Freixeiro (cocheiras), Piñeiros, O Ponto (con apartadoiro), A Revolta, A
Tilleira (Freire Hermanos, con apartadoiro), Santa Rita, O Portádego, Neda
(Santa María) e Neda (Concello, con apartadoiro). O ter vía única, os
apartadoiros eran precisos para o cruce das unidades que ían coas que viñan de
volta. A distancia entre a Porta Nova e Neda era de 9.424 metros.
Para a subministración da
electricidade a empresa instalou una central movida por dous motores diesel que
arrastraban cadanseu xerador Siemens de 120 quilovatios, 200 amperios e 600
voltios a 1.500 voltas por minuto. A potencia resultaba escasa con oito coches
en marcha pois “se van cheos de pasaxeiros e mercadorías saltan os
automáticos”, quedando as liñas momentaneamente sen servizo.
A primeira dotación fora
de cinco coches de madeira AEG saídos dos talleres da Compañía Auxiliar de
Ferrocarriles (CAF) en Beasain (Guipúzcoa). A caixa tiña capacidade para
dezaoito viaxeiros sentados e outros tanto de pé nas plataformas.
En 1925 se adquiriran a
Tranvías de Vigo dous automotores General Electric, cada un con dous motores de
36 cabalos, e nos anos 1928 e 1929 se completaba a dotación de material móbil, que
quedaba así configurada por nove coches motores, tres remolques, un furgón de
carga e un furgón mixto de carga e viaxeiros. Con este parque móbil e a
incorporación de dúas unidades de chapa e ferro construídas nos propios
talleres da compañía se chegará ata a fin dos tranvías en 1961.
Os tranvías iniciaban a
súa xornada saíndo das cocheiras (en Freixeiro, Narón) ás cinco e media da mañá,
e o último viaxe partía de Ferrol ás dez e vinte da noite, chegando ata Neda
antes de regresar de retirada ás cocheiras. Na década de 1950, cando case non
circulaban automóbiles e os taxis eran moi poucos, chegaron a transportarse máis
de catro millóns e medio de pasaxeiros ó ano (máximo de 4.696.210 viaxeiros no
ano 1951).
Os tranvías traballaban
unha media de dezasete horas diarias, cunha frecuencia de vinte e cinco minutos
e unha velocidade máxima de corenta e cinco quilómetros por hora, completándose
o traxecto en uns cincuenta minutos.
A vida dos tranvías ferroláns estenderíase desde o 28 de agosto de 1924 ata o 3 de xullo de 1961, data na que o derradeiro tranvía entrou nas cocheiras, facéndose cargo de tódalas rutas os autobuses que iniciaran a substitución un ano e medio antes, o 27 de xaneiro de 1960, coa inauguración da liña de autobuses chamada liña número dous (Praza de Armas - Jubia - Neda) e a supresión dos tranvías que ían a Xuvia e a Neda.
Tempo de uso:
Referencias Bibliográficas:
Alcalá Navarro,
X., 1987. A nosa cinza. 4ª ed. 1991.
Vigo: Galaxia. DL VG-510-1991. ISBN 84-7154-569-1.
Araguas
Álvarez, V., 2000, “O Hispano-Argentino: un conto e un poema”, Revista de Neda: anuario cultural do
Concello de Neda, nº 3, dir. Manuel Pérez Grueiro. Neda: Concello de Neda,
p. 57-59. DL-C-837-1998. ISSN 1139-1154.
Fraga Rodríguez, X., 1997. A Coruña-Sada-Carballo. Tranvías e trolebuses. A Coruña: Espiral
Maior.
Fraga Rodríguez, X., 2000. Pontevedra-Vigo. Tranvías e trolebuses. A Coruña: Espiral Maior.
Fraga Rodríguez, X., 2002. Tranvías de Ferrol. A Coruña: Espiral Maior. DL C-2649-2002. ISBN
84-95625-54-7.
Llorca Freire,
G., 2008, Ferrol: memoria da vida cotiá,
Ediciones de
Máiz Vázquez, B., 2000. As embarcacións de pasaxe das rías galegas (1573-2000). 2ª ed.
rev. y aum. 2001, Vigo: Edicións Xerais. DL 39-2001. ISBN 84-8302-607-4.
Nueva Enciclopedia Larousse, 1982. 20 vol., 2ª ed. 1983. Barcelona: Planeta. DL.
B-12.182-1982. ISBN 84-320-4260-9.