115 Minas de Freixo
- Provincia: Lugo
- Concello: Monforte de Lemos
- Parroquia: San Miguel de Marcelle
- Lugar: Freixo
- Paraxe: A mina
- Coord. Xeográficas - Latitude: 42.45340206101354
- Coord.Xeográficas - Lonxitude: -7.5046974420547485
- Coordeadas UTM: Huso 29 / X 623,20 / Y 4.701,40
- Clasificación: Minaría de ferro
- CNAE: Extracción de minerales de hierro (07.10 Magnetita Fe2O4 con Hematites Fe2O3 y Goethita Fe2O3H2O).
- Tipoloxía: Pozos e galerías
- Comarca: Monforte
- Acceso: Sáese de Monforte de Lemos cara ó sur, collendo a estrada LU-903 a Doade. A pouco máis de cinco quilómetros, en As Pereiras, tírase a man dereita pola carreteira que leva tras un quilómetro a Santa Lucía, continuando outro quilómetro cara o sur a aldea de Freixo. Pasada ésta continuamos sempre cara o sur e a uns dous quilómetros atoparemos na marxe esquerda da estrada o cargadoiro do mineral e o edificio da mina. Camiñando monte arriba pódense ver os pozos de ventilación e as bocas das galerías.
Tipo de propiedade:
Visitable:
Historia:
O ferro chega ó noroeste peninsular coas dúas invasións
(cara ó 950 a.C., a primeira, e cara ó 650 a.C., a segunda) procedentes de
Centroeuropa dos pobos portadores da chamada “cultura celta”, pobos que
contaban con armas dunha resistencia ata entón descoñecida.
Estes invasores prontos recoñecen a gran experiencia dos pobos
autóctonos en traballos metalúrxicos, e identifican grandes depósitos aptos
para a obtención de bo metal. A coincidencia destes dous factores favorece a
fusión de invasores e invadidos, iniciándose así o florecemento dunha industria
fundamental no desenvolvemento na rexión da cultura castrexa, que se manterá
aínda durante a romanización.
Os utensilios e as armas de ferro procedentes de Galicia
pronto acadan fama en todo o mundo coñecido. Aínda que chegou a aventurarse a
idea de que o seu bo tempero e a súa dureza debésense ao contido en volframio,
tal idea resulta un pouco desatinada, tendo en conta que nin aquelas forxas
podían acadar as elevadas temperaturas necesarias para a fusión do volframio,
nin os depósitos de ferro se localizan próximos ós de volframio.
No ano 137 a.C., oitenta despois do desembarco romano na
mediterránea Emporion (Ampurias, Tarragona) para cortar as subministracións
terrestres de Aníbal durante a segunda guerra púnica, o procónsul Décimo Julio
Bruto, que se titularía “Galaico”, inicia a ocupación dos territorios que máis
de catrocentos anos despois (desde o 305 d.C. co emperador Diocleciano) pasaría
a chamarse Gallaecia.
A gran experiencia mineira acumulada polos romanos
lévalles a comprender decontado as grandes posibilidades da rexión (ouro, estaño,
ferro), na que crean un enorme couto mineiro que explotarán sen intermediarios,
cun Procurator Metallorum que vela
polos intereses do Estado mentres a Sétima Lexión Xemelga (Legio Septima Gemina) custodia o perímetro Braga-Astorga-Lugo e o
trazado das calzadas principais subordinase ós intereses mineiros do territorio
galaico.
Do mesmo xeito que no caso doutros metais, a explotación
do ferro coñece nesta época adiantos técnicos importantes. Coa descomposición
do imperio, o terreo que cede Roma vai sendo ocupado polas vilas bárbaras; os
suevos ocupan Galicia desde o 411, e continúan a herdanza mineira dos romanos
aínda que carentes da súa organización e sentido comercial, coa conseguinte
decadencia e o refuxio da técnica nos mosteiros.
Entre a ocupación de Lugo por Muza (714) e o arrasamento
de Compostela por Almanzor (997), o dominio árabe é moi lixeiro, e no que
atinxe á minaría só interésanse polo ouro e as pedras para xoiaría, como os abelorios
(berilos) de Viveiró.
Das invasións normandas nesta época, cómpre mencionar a
do ano 968, que desde Iria Flavia e tras ser rexeitada en Compostela, acada e
ocupa as minas e ferrerías do Cebreiro, o que lles permite fornecerse de armas e
guerrear en terra galega durante dous anos.
As loitas feudais e a continua ameaza de invasións
orixinan un importante desenvolvemento da minaría do ferro e das ferrerías, que
conseguen o perfeccionamento de procedementos e técnicas. Os depósitos entón
explotados eran aqueles máis favorables para a redución dos seus minerais coas
técnicas ó uso, desenvolvidas nos mosteiros beneditinos (Celanova, documento do
959; Sobrado, do 966; Samos, do 1062) e posteriormente perfeccionadas coa
frecuente colaboración dos ferróns vascos (arotzas)
desde a primeira metade do século XVI.
Aproveitábanse daquela minerais de alta lei en ferro e
baixo contido en fósforo “que agre o aceiro” (acritude, alteración do estado
estrutural de equilibrio) e as ferrerías situábanse nos sitios máis axeitados
para o aproveitamento das augas dos ríos nos procesos de mecanizado, aireación,
arrefriado e tempero; as madeiras de castaño e carballo achegaban a temperatura
necesaria e a redución dos óxidos lográbase grazas ao carbón de uz.
A calidade dos aceiros medievais galegos recoñécese en
toda Europa, e o porto de Pontevedra configúrase tamén como un dos máis
importantes puntos de exportación dos diversos produtos elaborados cos nosos
ferros.
Xa na Idade Moderna, o condado de Maceda ostentará
durante douscentos anos o dominio dun dos principais veneiros de ferro, o de
Formigueiros (Visuña, Folgoso do Courel), desde 1513 ata a súa cesión á Abadía
de Samos en contrato datado o ano 1707. Pola súa banda, o condado de Lemos
controlaba o outro gran veneiro da época, o de Roques (Ferreiros, Pobra do
Brollón).
Trala extracción polos chamados venaqueiros (empregando
picos e cuñas ou guillos nos que petaban con pesadas marras) e o calcinado do
mineral (practicando un oco grande no solo e mesturando mineral e leña que
botaba ardendo horas e mesmo días), o beneficio do ferro desenvolvíase en tres
tipos de instalacións, que podían ou non estar unidas e que cumprían funcións
distintas.
O mineral xa calcinado fundíase nas ferrerías, obténdose ferro bruto
informe ou en lingotes. Os propietarios arrendaban a ferrería ó ferrón e este
contrataba ó equipo de produción: o mestre ou aroza; o tirador, que
sacaba o ferro do forno e o traballaba no mazo; os fundidores, que atendían ó forno; e o tazador, aprendiz encargado de esmiuzar a vea para que fundise
mellor.
De seguido o ferro bruto labrábase ou estiraba nos mazos
(tamén chamados machucos ou picapeixes). O mazo atopábase xeralmente a carón da
ferrería aínda que existiron tamén mazos illados que debían xa que logo contar
cun forno para quentar o ferro.
Finalmente, nas fraguas ou forxas os ferreiros
transformaban o ferro en diversos obxectos de uso común: cravos, ferraxes,
reixas de arado, apeiros de labranza, etc. As máis das veces ferrería, mazo e fragua
eran partes diferenciadas dunha única instalación, aínda que como se ten dito
podían ser independentes e mesmo atoparse afastadas unhas das outras.
A demanda de ferro redúcese notablemente unha vez
finalizadas as guerras irmandiñas (1469) e a reconquista peninsular (1492), e
pese ó intento de reactivación da minaría mediante unha pragmática outorgada en
Valladolid o 10 de xaneiro de 1559 pola princesa gobernadora dona Juana, que se
traduce nun aluvión de solicitudes que obriga vinte e cinco anos despois á
redacción das chamadas “Ordenanzas de Felipe II” para a regulación do sector, a
realidade é que non se acadan os obxectivos pretendidos ó resultar máis
rendible (tamén para a Coroa) a explotación dos minerais americanos, e en
consecuencia o século XVII caracterízase por un novo abandono da minaría,
acentuado se cabe polo auxe agrícola coa adaptación do terreo ao cultivo do
millo e a pataca.
A sobreexplotación madeireira e a crecente dificultade
para obter carbón vexetal, o avellentamento das técnicas utilizadas e a
competencia pola introdución noutros países dos procedementos siderúrxicos
indirectos ó forno alto aceleran o declive da ferrería tradicional e a
decadencia da minaría férrea en Galicia.
Co século XVIII iníciase o despegue da industria mineira
galega, activado por tres factores fundamentais como foron a utilización da
pólvora no avance de pozos e galerías, o emprego da máquina de vapor (1712) e,
máis tarde, a evolución da ferrería (forno baixo, fragua ou forxa á catalana) ó forno alto (Sargadelos,
1791).
O século XIX vese envolto, case sen interrupción, por
continuos conflitos bélicos, desde as guerras napoleónicas ata a perda das
últimas colonias ultramarinas, Cuba e As Filipinas, pasando polas contendas
carlistas. Tras a morte do seu creador (1809) a siderurxia de Sargadelos acada
as súas máximas producións, pero a falta de renovación das súas instalacións, a
desforestación, a crecente dificultade na explotación dos depósitos férreos e,
sobre todo, a maior competencia de materiais procedentes doutras rexións ó
quedar Galicia comunicada por ferrocarril (1883, Coruña-Ponferrada), aceleran a
decadencia do complexo siderúrxico lugués.
Aínda que aínda foron numerosos os depósitos de ferro que
se explotaron desde entón nun último esplendor (Abeledo, Pena do Corvo, Santar,
Roupar, Ferreiras, Fonsagrada, San Clodio, Reinante, Incio… ), a minaría do
ferro en Galicia conta con tres senlleiros e magníficos exemplos serodios que
foron explotado racional e sistematicamente desde finais do século XIX ata
mediados do XX.
As minas de Freixo (Monforte de Lemos, Lugo),
documentadas xa desde o século XV, coñeceron tempos de esplendor desde o ano
1913 ata o seu peche en 1958, extraéndose magnetita para a súa exportación a
Inglaterra e Alemaña desde os embarcadoiros de Rande (Redondela, na ría de Vigo).
Nas minas de Vilaoudriz (A Pontenova, Lugo) desde 1866
ata 1960 extraérase hematites, xunto con goethita, siderita e pirita; o mineral
calcinábase nuns fornos situados na bocamina e un ferrocarril construído ex profeso
trasladaba os concentrados ata o porto de Ribadeo, onde se embarcaban para os
seus destinos finais en Inglaterra e Alemaña.
En terceiro lugar, as minas de ferro da Silvarosa
(Viveiro, Lugo) beneficiaron magnetita con hematites e goethita desde 1893 ata
1960. O mineral extraído transportábase mediante un funicular bicable ata o
cargadoiro de Ínsua, xa na ría de Viveiro, desde onde se despachaba en buques ós
habituais destinos en Inglaterra e Alemaña.
Pode concluírse que o ferro foi un dos principais
impulsores da industrialización en Galicia, con dúas etapas claramente
diferenciadas: unha primeira desde a época romana ata a conquista de América; e
unha segunda desde finais do século XVIII ata mediados do século XX. Os estudos
realizados como consecuencia do illamento internacional sufrido por España trala
Segunda Guerra Mundial, evidencian o interese destes depósitos de ferro polas
súas posibilidades de explotación e posterior transformación, pero deixaron
igualmente claro que tal explotación non sería competitiva mentres fosen
accesibles minerais doutros depósitos, con prezos inferiores, altas leis e
baixas impurezas.
Construcción:
Abandono:
Descrición:
As minas de ferro de Freixo, atópanse na parroquia de San Miguel de Marcelle do concello de Monforte de Lemos (Lugo). Os documentos máis antigos xa
falan das minas no século XV, cando eran explotadas para fornecer ás ferrerías
que provían de material e armamento ó primeiro Conde de Lemos, Pedro Álvarez
Osorio.
Algúns séculos máis adiante, con capital procedente dos
emigrantes establecidos na República Arxentina constituíase en 1913 a “Compañía
General Minera de Galicia”, co obxectivo de “explotar las minas de hierro de
Freijo (Monforte)”.
As minas están situadas sobre unha corrida duns dous mil metros con rumbo
noroeste a sueste na que se integran catro capas con potencias entre medio
metro e dous metros e medio. O mineral (magnetita, Fe2O4) presenta dominio dos carbonatos, coa seguinte lei: Fe 53 a 60%; SiO2
4 a 8%; P 0,6 a 0,8%. A súa explotación contou cunha eficiente dirección
técnica e con bos recoñecementos mediante doce galerías que suman case seiscentos
metros escavados.
Ó fronte da mina atopábase o enxeñeiro alemán e vicecónsul de Alemaña en
Monforte de Lemos don Frederic Wilhelm Cloos, que xunto con técnicos tamén alemáns
dirixiu con gran eficacia os labores mineiros que permitiron subministrar ferro
ó seu goberno tanto na primeira (1914-18) como na segunda (1939-45) guerra
mundial.
Nos primeiros tempos o material transportábase por medio
de vagonetas suspendidas de cables desde a bocamina de Freixo ata a estación
ferroviaria de Canaval (uns oito quilómetros), no veciño concello de Sober
(Lugo), e de aquí levábase por ferrocarril ata ó porto de Vigo (uns cento cuarenta quilómetros), do que marchaba
por mar ata Alemaña.
No ano 1924 constituíase en Madrid a compañía “Minerales de Hierro de
Galicia”, vinculada a capital de orixe alemán. Para mellorar a loxística do
transporte do mineral de Freixo ata os barcos, constrúe en Rande, na mesma ría
de Vigo, o cargadoiro máis antigo que alí se coñece, chamado “do alemán”.
O primeiro cargamento de mineral de ferro extraído na
mina de Freixo para a industria alemá que embarcou no cargadoiro de Rande fixérao
en 1926 no vapor Estoril, como recollera o famoso fotógrafo ourensán-vigués Pacheco.
Durante a Segunda Guerra Mundial tamén se cargaría aquí o volframio procedente
das minas galegas e o ferro das leonesas (como do Coto Wagner, en Ponferrada).
O cargadoiro caería despois en desuso e a parte construída en ferro que metíase
no mar foi desmantelada; porén aínda hoxe pódese ver o resto da estrutura construída
en pedra e formigón.
En 1960 iniciábase en Rande a construción doutro cargadoiro máis moderno, formado
por tres plataformas unidas a terra por unha estrutura metálica que dispuña
dunha cinta transportadora. Pertencía á empresa “Minero Siderúrgica de
Ponferrada, S.A.”, que o empregaba para embarcar o ferro (do Coto Wagner) e o
carbón (de Laciana e do Bierzo), que chegaban por tren procedentes de Ponferrada
para seren exportados a Inglaterra e Alemaña, fundamentalmente. Este segundo cargadoiro
mantivérase operativo ata mediados da década do 1970.
As minas de Freixo foron de grande importancia económica e social para a
comarca monfortina, podendo entenderse mesmo como un dos piares nos que se sustentou
a economía local, nomeadamente durante as dúas guerras mundiais, cando extraérase
unha gran cantidade de ferro para a industria alemá. A súa actividade decaeu
notablemente na década de 1950, e aló polo ano 1958 pechaban definitivamente. A
cantidade explotada calculouse en quince mil toneladas e, desgraciadamente, a
explotación non seguiu adiante porque á xa escasa potencia das capas sumábase
unha excesiva distancia –uns cento cincuenta quilómetros– ós portos de embarque.
Materias Primas:
Distribución e comercialización:
Referencias Bibliográficas:
Aira
Pardo, F., y Casanova Otero, J.R., 2009. Minas
de Freixo [en línea]. Disponible en Internet:
http://www.jrcasan.com/MONFORTE/freixo/minas.htm [Último acceso 21
de agosto del 2009].
Cueto
y Noval, R. del, 1928, La minería de la
región gallega, reproducción facsimilar por
Daporta Padín,
X.R., et al., 1980, Galicia en mapas, Escola Aberta, Coruña.
D.L. C-630-1980. ISBN 84-300-3088-3.
González
Pérez, C.,
Hernández
Sampelayo, P., 1922, Hierros de Galicia,
tomo I, Gráficas Reunidas, Madrid.
Hernández
Sampelayo, P., 1931, Hierros de Galicia,
tomo II, Gráficas Reunidas, Madrid.
Hernández
Sampelayo, P., 1934, Geología gallega
(Discurso de ingreso en
Hernández
Sampelayo, P., 1935, Hierros de Galicia,
tomo III, Gráficas Reunidas, Madrid.
Lara Coira, M., 2010: “La minería y el patrimonio minero en Galicia”. Tierra y tecnología, revista de información geológica, número 36, segundo semestre 2009, Madrid: Ilustre Colegio Oficial de Geólogos, p. 65-76. DL M-10.137-1992. ISSN 1131-5016.
Migueles González,
J., 2009. As antigas empresas. Anecdotario
Redondelán [en línea]. Disponible en Internet:
http://anecdotarioredondelan.jimdo.com/as-antigas-empresas/ [Último acceso 21 de agosto del 2009].
La minería de Galicia, 1991, Dirección
Xeral de Industria de
Mirre,
J.C., 1990, Guía dos minerais de Galicia,
Galaxia, Vigo. D.L. VG-328-1990. ISBN 84-7154-729-5.
Schulz,
G., 1835. Descripción geognóstica del
Reino de Galicia, acompañada de un mapa petrográfico de este país.
Herederos de Collado, Madrid, ed. facsimilar de 1985 da Área de Xeoloxía e
Minería do Seminario de Estudos Galegos, Ediciós do Castro, Sada, Coruña.
Vázquez Vaamonde, M.C., 1996. La metalurgia en Galicia de
los siglos XVIII al XX: ferrerías, fundiciones y forjas. Santiago de Compostela: Universidade de Santiago.
Índice de mapas e planos:
Localización Mapa Topográfico Nacional 1:25.000: Hoja 189-I Torbeo
/ X 623,20 / Y 4.701,40