178 Estaleiro do Reverbero
- Provincia: A Coruña
- Concello: Ferrol
- Parroquia: Santa Rosa de Viterbo
- Lugar: A Graña
- Paraxe: O Reverbero
- Dirección: Non procede
- Coord. Xeográficas - Latitude: 43.476793685317254
- Coord.Xeográficas - Lonxitude: -8.262319564819336
- Coordeadas UTM: Datum europeo 1950: Fuso 29 // X 559.751,56 m / Y 4.814.253,65 m
- Clasificación: Construción naval
- CNAE: 30.11 Construción de barcos e estruturas flotantes.
- Tipoloxía: Carpintería de ribeira industrial
- Comarca: Ferrol
- Marco Xeográfico: A Graña, na marxe dereita da ría de Ferrol.
- Ámbito: Rural e mariñeiro
- Acceso: As instalacións foron ocupadas para a construción da estación naval da Graña e non queda pegada delas, amais de atoparse a súa localización no interior do recinto militar.
Tipo de propiedade:
Visitable:
Xestión de visitas:
Historia:
Nunha rexión como Galicia, con
extensa costa, algunhas lagoas e numerosos cursos fluviais, debe sen dúbida ser
case tan antiga como a aparición do home a industria de construción e
reparación de embarcacións, aínda que ata o momento só poidamos remontarnos no
tempo ata o achado dunha embarcación prehistórica —a monóxila— feita do tronco
oco dunha árbore e desenterrada dos lodos prehistóricos da lagoa de Antela.
Desde este remotísimo
descubrimento, e sen dubidar de que a construción de embarcacións mantívose
activa en tantos séculos escuros, a falla de máis datos obríganos a un
prodixioso salto na historia, que nos leva aos albores do século XII, cando as
correrías dos normandos e os zanfoneos dos árabes fixeron, por fin, pensar en
defenderse no mesmo elemento mariño.
Iniciada a actividade naval
militar en Cantabria e Cataluña, a mariña castelá tomou en Galicia as súas
primeiras naves, e contra 1122 Diego Xelmírez emprendeu a tarefa de crear a
primeira escuadra galega: ordenou traer desde Arlés, Pisa e Xénova expertos en
construción de barcos e homes entendidos nas prácticas do mar. Coa construción
baixo a dirección do Mestre Oggiero de dúas galeras birremes nos afamados
estaleiros de Iria Flavia, establécese a primeira base naval da armada galega
no mar de Arousa.
O inicio do século XIV trasládanos
á desembocadura do río Belelle no mar de Xuvia (ría de Ferrol) para encontrar
os arsenais nos que os carpinteiros de Neda construíron as naves que en 1340 ó
mando do capitán Alonso Esquío combateron ós berberiscos no sur peninsular, e
cuxa destacada intervención moveu á concesión por Alfonso XI de foros e
privilexios á Vila de Neda. Pese a que a crecente competencia ferrolá desde
mediados do século XVIII e a paulatina redución do calado da ría aceleraron a
súa decadencia, estes estaleiros nedenses mantiveron unha notable actividade
ata principios do século XX, para ceder finalmente a testemuña ós grandes
estaleiros de Maniños, Barallobre e Perlío.
A finais do século XV, cando os
Reis Católicos confirmaron á Vila de Foz as súas franquías e inmunidades, os
seus estaleiros eran dos principais de Galicia, destacando tamén nesta época os
estaleiros de Pontevedra e –xa a principios do XVI– os diversos arsenais da ría
ferrolá fundamentalmente ocupados na construción de galeras para a armada real.
Se xa en 1346 se documenta o
transporte de vino desde Ribadeo a Brest, non é de estrañar a solvencia dos
seus varadoiros, nos que tamén se reparaban as embarcacións que transportaban
madeira a Andalucía e retornaban co valioso sal.
Noia é outra poboación costeira
que destaca no século XVII, xunto coas xa nomeadas, pola calidade dos seus
estaleiros e varadoiros.
Serían sen dúbida numerosos,
ademais destes establecementos principais, os pequenos estaleiros e
carpinteiros de ribeira diseminados polas praias e enseadas galegas. Recoñécese
incluso como frecuente o desprazamento dos mestres y operarios de algún
estaleiros para a construción das embarcacións que se demandaban en
circunstanciais emprazamentos que se configuraban como varadoiros para a
ocasión.
A pesca e o comercio marítimo
souberon das gabarras de Viveiro; as bucetas de O Barqueiro; os barlotes de
Bares; os traiñóns de Cariño; os trincados de Maniños e Barallobre; as miñotas
de Miño e as sadiñas de Sada; as lanchas de Fisterra; os galeóns de Arousa; as
batelas e os anguleiros de Tui; os botes, menuetas, chalupas, gamelas,
chalanas, faluchos,pataches… e, por suposto, as dornas: dornas de O Son, de
Castiñeiras, de O Grove…
Estaleiros de Domaio, de Baldráns,
de Cangas, de Coruxo… Afortunadamente podemos recuperar a memoria de moitos
deles nos traballos de Staffan Mörling ou de José María de Juan-García. Non
son, sen embargo, demasiados os que hoxe sobreviven á invasión do ferro e,
sobre todo, dos plásticos. Aínda estamos a tempo de fixar no recordo a pegada
da maioría de eles e aínda quizá de conservar a memoria viva do traballo
amoroso de algún dos que, en verbas de Antón Avilés de Taramancos, “na outra
banda do mar…están a construír a torre de cristal da miña infancia”.
A sublevación a partires de 1567
dos Países Baixos fixo bascular cara ó Atlántico os intereses da Coroa dos
Austrias, e tralo fracaso da Armada Invencible e o ataque de Drake á Coruña en
1588, Felipe II elixe a ría de Ferrol como porto de invernada e reparación da
flota. En 1589 comézase a construción do castelo de San Felipe para a defensa
da ría, á que seguirían os castelos de San Martín e da Palma. E para o
fornecemento de víveres constrúense a partires do ano 1591 doce fábricas de
biscoitos en Neda e outras seis en Betanzos, pero xa no 1603 a Armada marcharía
da ría para invernar na Coruña, primeiro, e en Lisboa, despois.
Tralo novo equilibrio europeo que
supoñen os tratados de Utrech (1713) e Rastadt (1714), os Borbóns comezan a
reconstrución interior do país e a reorganización da Mariña. Os traballos
encomendados a José Patiño van frutificar na Orde do 5 de decembro de 1726 pola
que Felipe V promove o arsenal da vila da Graña, onde comezará en 1730 a
construción naval.
O Marqués de la Ensenada, sucesor
de Patiño, continuará a súa política, e en 1740 constrúense as primeiras
bancadas dos novos estaleiros na enseada de Esteiro, e xa en 1749 Fernando VI
decreta a construción do Real Estaleiro en Ferrol, extra muros do núcleo
medieval ferrolán, que concentrará dende entón a construción naval militar na
ría de Ferrol e estimulará a construción en distintos puntos da ría de varios
estaleiros de ribeira, industriais e artesanais, de apoio á construción,
reparación e mantemento de embarcacións de variado porte.
Descrición Xeral do Entorno:
Os estaleiros situáranse nos terreos do primitivo arsenal
da Graña, na extrema meridional da actual base militar da Graña.
Construcción:
Abandono:
Quebrou en 1898 e parte das instalacións foron
expropiadas en 1916 para a construción da estación naval militar da Graña. Coa
ampliación en 1957 da Base Naval da Graña, o que quedaba das vellas
instalacións desapareceu.
Descrición:
No ano 1845 fundábase a sociedade
“Abella, Braña e Cía.”, que vai comezar a construción de buques nas instalación
que a tal efecto constrúen no lugar do Reverbero, nos terreos que foran do
primitivo Arsenal da Graña e que ocupara o forno de reverbero que tiñan na
fundición. As novas instalacións contaban cun edificio de almacéns, sala de
gálibos, oficinas, catro fraguas, dúas bancadas e un dique de mareas.
Ata o ano 1858 construirían tres
fragatas, Braña, Abella, e Villa de Neda; un
bergantín, Juanita; catro bergantíns
goleta, Joven Matilde, Joven César, Ceres e Eugenio; e unha
polacra Paloma de Cantabria.
En 1858 o estaleiro é adquirido por o banqueiro coruñés Augusto José de Vila y Sánchez de León, quen ampliou as instalacións cun taller de fundición, un taller de forxa, dúas bancadas e un varadoiro. Nesta época o estaleiro de Augusto Vila chegou a ser considerado o primeiro estaleiro particular de España e construíra os seguintes buques: catro fragatas de vela, Nueva Ignacia, Fermina de Vila, Francisco de Vila, e Sofía de Vila; catro corvetas, María Blanca, Anastasia, María e Tula; dous balandros, Elisa e Augusto; dous bergantíns, Rosita e Portugalete; e unha lancha de vapor, Nuestra Señora del Carmen.
Augusto Vila morría repentinamente en 1874 sen ter organizada a súa sucesión, polo que os seus negocios sufriron graves perturbacións polas dificultades de xestión. O estaleiro continuaría traballando con dificultades crecentes polo abandono da construción naval en madeira, substituída polas embarcación de ferro.
Trece anos máis tarde, coa promulgación da Ley de Escuadra de 1887, os seus fillos retoman a actividade do estaleiro,realizando diversas obras e adquirindo a maquinaria necesaria para a construción de buques de ferro e aceiro, poñéndoo baixo a dirección técnica do enxeñeiro da Mariña don Avelino Comerma e creando a sociedade “Vila y Cía.”.
A nova etapa comezaría coa construción en 1889 de tres buques canoneiros torpedeiros de casco de aceiro para a mariña española, o Rápido, o Veloz e o Galicia, entregados en 1892. Cada un deles contaba con senllas máquinas de vapor de tripla expansión, alimentadas por unha caldeira de carbón, que proporcionaban un total de 2.600 CV un andar máximo de 18 nos e 12 en cruceiro.
En 1894 o estaleiro comezou a construción de outros tres canoneiros para a Mariña, adxudicados en concurso, o María de Molina, o Álvaro de Bazán e o Marqués de la Victoria. As dificultades nas importacións de material e os conflitos da época (problemas laborais, insurrección de Cuba e guerra contra os Estados Unidos) suporían retrasos na construción, suspendéndose os traballos no mes de agosto de 1898. A factoría foi incautada polo Estado no mes de decembro do mesmo ano 1898 e os barcos en construción trasladados ao arsenal de Ferrol para a súa finalización. Após un longo preito, o estaleiro sería devolto en 1915 aos seus propietarios, recoñecéndolles o dereito de resarcirse dos gastos ocasionados.
No ano 1916 parte das instalacións dos estaleiros Vila foron expropiadas para a construción da Estación Naval da Graña, de utilización militar. Para a ampliación da Base Naval da Graña, en 1924 se autorizaría a adquisición directa dos Estaleiros Vila polo Ministerio de Mariña, e coa ampliación acometida en 1957, desaparecería todo rastro do que fora o Estaleiro do Reverbero ou Estaleiro de Vila.
Tempo de uso:
Sistema de produción:
O proceso de construción que
tradicionalmente seguiron os carpinteiros de ribeira artesanais é de tipo
secuencial.
O barco contrátase sobre a base
dunhas dimensións principais (eslora total, manga fora de forros e puntal de
construción) e unha sinxela especificación de materiais, cuxa complexidade
aumenta co tamaño.
O carpinteiro define a forma do
casco coa elaboración da maqueta ou maqueto,
un modelo a escala reducida do medio casco en madeira, ou ben, no canto de
embarcacións menores, mediante a construción e o montaxe dos elementos
principais (roda, codaste, unha ou varias cadernas), que sérvenlle de elementos
directores para obter a superficie empregando rixideiras (junquillos).
A elaboración das pezas que van
formar a estrutura comeza coa selección da madeira, e continua co trazado e o
corte. O proceso construtivo, así sinxelamente descrito, remata co montaxe a
bordo e o ensamblaxe dunhas pezas coas outras.
No traballo tradicional xeralmente
non se facían planos, gozando dunha ampla liberdade para definir as formas do
casco e os aspectos construtivos da estrutura, respectando as dimensións
principais e os escantillóns dos elementos básicos do proxecto. As montaxes
mecánicas as realizaba normalmente persoal alleo ó estaleiro.
Ademais da propia dimensión empresarial,
a carpintería de ribeira industrial tiña como diferenzas significativas o feito
de que traballábase sempre sobre plano e de que dispuñan de un cadro de persoal
estable, ademais de que xeralmente levaban a cabo as montaxes mecánicas nos
seus propios talleres.
Actividades laborais:
Emprego:
Materias Primas:
Madeira, estopa e brea, cravazón e pernería, e pintura.
Produtos Elaborados:
Distribución e comercialización:
Referencias Bibliográficas:
Antón Viscasillas, Jaime; Anca Alamillo, Alejandro (2015): La Graña – La Cabana. Base e industria naval (1726-2015), Ferrol: Autoridad Portuaria y Armada Española.
Artime
González, A., 1994, La construcción de
embarcaciones de madera en los astilleros de Luanco, Museo Marítimo de
Asturias, Luanco. ISBN 84-86889-28-6.
Ateneo Ferrolán, 2009. A construcción naval na
ría de Ferrol. Cadernos do Ateneo Ferrolán, ano
XX, número 19, 2008. Ferrol: Ateneo Ferrolán. DL C-994-2009. ISBN 84-933518-1-4.
Blanco
García, J., 2008, Guía de las
embarcaciones tradicionales gallegas, Edicións Nigra Trea, Vigo. DL
VG-488-2009. ISBN 978-84-95364-87-6.
Carmona
Badía, X., 2009. “El patrimonio industrial maritimo en Galicia: la conservación
de la pesca y la construcción naval”. Il patrimonio industriale marítimo in Italia e Spagna.
Strutture e territorio (Genova, 26-27 ottobre 2007). A cura di A. di Vittorio, C. Barciela López, P. Massa. Societá Italiana
degli Storici dell’Economia e Universitá degli Studi di Genova, p. 167-186. Genova: De Ferrari.
Echenique
Gordillo, I., 2000: Madeira de mar. Apuntes sobre a
gamela. Vigo: Galaxia. DL VG-440-2000. ISBN 84-8288-378-X.
Gil
de Bernabé López, J.M., 1984, Guía de la
Artesanía de Galicia, Servicio de Publicaciones del Ministerio de Industria
y Energía, Madrid. DL M-945-1984, ISBN 84-7474-229-3.
Gil
de Bernabé López, J.M., 1988, Galicia
Artesana, Editorial Everest, León. DL LE-39-1988, ISBN 84-241-4652-2.
Juan-García
Aguado, J.M. de, 2001, La carpintería de ribera en Galicia (1940-2000),
Servicio de Publicacións da Universidade da Coruña, Monografías nº 95, Coruña.
ISBN 84-95322-71-4.
Juan-García Aguado, J.M. de, 2009. “A carpintaría de
ribeira na ría de Ferrol”. A construcción naval na ría de Ferrol.
Cadernos do Ateneo Ferrolán, ano XX, número 19, 2008. Ferrol: Ateneo Ferrolán, p. 33-40. DL C-994-2009.
ISBN 84-933518-1-4.
Juan-García Aguado, J.M. de, y Rey Fraguela, J.,
2008, “Los últimos carpinteros de ribera de Neda”, Revista de Neda: anuario cultural do Concello de Neda, nº 11, dir.
Manuel Pérez Grueiro, Concello de Neda, Neda, Coruña, p. 76-85. ISSN 1139-1154.
Lara Coira, M., 2009, “Carpintería de ribera”, Gallegos, número 5, I trimestre 2009,
Ensenada de Ézaro, Santiago de Compostela, p. 94-97. D.L. VG-549-2008. ISSN 1889-2590.
Lorenzo Fernández, X., 1962, “Etnografía: cultura material. Os oficios: Carpinteiros de
ribeira”, Historia de Galiza, Ramón
Otero Pedrayo (dir.), Editorial Nós, Buenos Aires. Vol. II, p. 486-491. ISBN
84-9745-054-X.
Lorenzo Fernández, X., 1983, Os oficios, Biblioteca Básica da Cultura Galega, Editorial Galaxia,
Vigo. p. 301-305. ISBN 84-7154-425-3.
Máiz Vázquez, B., y Freire Hermida, E., 2009, As embarcacións tradicionais: do Arco
Ártabro a Ribadeo, Museo do Pobo Galego e Edicións Embora, Ferrol. ISBN
978-84-92644-01-8.
Massó y García-Figueroa, J.M., 1992, Barcos en Galicia. De la prehistoria hasta
hoy y del Miño al Finisterre, (2ª ed.), Diputación Provincial de
Pontevedra, Pontevedra. ISBN
84-86845-7629-3.
Mörling,
S., 1989, As embarcacións tradicionais de
Galicia, Dirección Xeral de Formación e Promoción Social da Xunta de
Galicia, Santiago de Compostela. ISBN 84-453-0070-9.
Mörling, S., 2005, Lanchas
e dornas. A estabilidade cultural e a morfoloxía das embarcacións na costa
occidental de Galicia, Consellería de Pesca e Asuntos Marítimos da Xunta de
Galicia, Santiago de Compostela. ISBN 84-453-4130-8.
Pazos Pérez, L.J., 2009. Aqueles barcos de madeira.
Carpinterías de ribeira. Apuntamentos para una memoria marítima de Galicia.
Pontevedra: Damaré Edicións. ISBN 978-84-935835-8-3.
Santalla
López, M., 2003, Las Reales Fábricas de
Ferrol. Gremios y barcos en el siglo XVIII, Ilustraciones de Xoán Braxe,
Edicións Embora, Ferrol. ISBN 84-95460-32-7.
Santalla
López, M., 2006: Ferrol. Historia social
(1726-1858). Vigo: Edicións A Nosa Terra. DL 243462-2006. ISBN
978-84-8341-057-8.
Índice de mapas e planos:
Localización no Mapa Topográfico Nacional 1:25.000: Folla 21-II Ferrol
// Datum europeo 1950 (ED50) Fuso 29 // X Fuso 29 // X 559.751,56 m / Y 4.814.253,65 m