Sociedad Anónima Cros

Nos finais de 1931 a compañía catalana Sociedad Anónima Cros inauguraba no Burgo (Culleredo, A Coruña) unha fábrica para producer superfosfatos de cal, fertilizante de uso xeralizado en Galicia dende os comezos do século XX. As materias primas eran piritas de Huelva e fosfatos naturais de Casablanca (Marrocos) e Sfax (Túnez). Contra 1935 ampliaría a gama de produtos coa produción de sulfato de cal, e contaba daquela cun cento de traballadores.

En 1960 a produción foi derivada cara ós abonos complexos e granulados, fabricándose ácido sulfúrico e outros tipos de ácidos destinados á industria conserveira, principalmente para Copiba e Pebsa. As instalacións deixaban de funcionar na década de 1980 e xa no ano 1989 culminaba a fusión da Sociedade Anónima Cros coa Unión Explosivos Río Tinto e nacía a Ercros, S.A., caendo no abandono as vellas instalacións do Burgo.

Na década de 1990 e comezos da do 2000 moitas das instalacións fabriles da Cros –os almacéns, as estruturas metálicas e mesmo a cheminea de fábrica de ladrillo– foran demolidas para reurbanizar a meirande parte da zona ocupada (chegara a ocupar uns 150.000 m2). No seu lugar construíronse edificios de vivendas e un centro comercial, acondicionándose un paseo pola beira do río e unha ampla zona verde ó seu carón.

No outono do 2010 comezaron os labores de descontaminación do solo e o derrube dos paramentos entre os elementos estruturais das edificacións que se deixaron en pe, que van ser consolidadas e recuperadas para albergar un centro cultural.