Ferrol e o turismo industrial

No mes de marzo do 2006 tiña lugar en Angers (Francia) o Primeiro Congreso Europeo de Turismo Industrial. O segundo tería lugar en Toledo (España) no mes de novembro do 2008, e Turín (Italia) acollía o terceiro en outubro do 2010.

Vimos agora da clausura do Cuarto Congreso Europeo de Turismo Industrial, acollido nesta volta na vila de São João da Madeira, distrito de Aveiro da área metropolitana de Oporto, no veciño Portugal. E no peche da xuntanza deuse a coñecer que das propostas presentadas, fora Ferrol o lugar elixido para a celebración no mes de novembro do ano 2014 do Quinto Congreso Europeo de Turismo Industrial. Vai callar desta maneira a semente pousada a finais do mes de febreiro do 2010 cando celebráramos na vila ferrolá o Quinto Congreso para a Conservación do Patrimonio Industrial e a Obra Pública en España.

Todas as edicións deste Congreso están dirixidas a profesionais turísticos, autoridades públicas, organizacións empresariais, asesores turísticos, compañías do sector, asociacións de patrimonio industrial, profesores universitarios e estudantes.

Espérase que este Congreso aumente o Turismo Industrial en España, y en Galicia en particular, elevando a concienciación e o saber facer dos organismos públicos nacionais e das empresas interesadas, e promovendo a creación de redes entre eles.