144 Carpintería de Purro
- Provincia: Pontevedra
- Concello: Bueu
- Parroquia: San Martiño de Bueu
- Lugar: Bueu
- Paraxe: Praia da Banda do Río
- Coord. Xeográficas - Latitude: 42.326839785113414
- Coord.Xeográficas - Lonxitude: -8.789759874343872
- Coordeadas UTM: Fuso 29 // X 517,32 / Y 4.686,09
- Clasificación: Construción naval
- CNAE: 30.11 Construción de barcos e estruturas flotantes
- Tipoloxía: Carpintería de ribeira
- Comarca: O Morrazo
- Marco Xeográfico: Enseada de Bueu
- Ámbito: Urbán
- Acceso:
O estaleiro atópase no mesmo núcleo urbán de Bueu, na rúa Montero Ríos e fronte á Praia da banda do río.
Tipo de propiedade:
Visitable:
Historia:
Nunha rexión como Galicia, con extensa
costa, algunhas lagoas e numerosos cursos fluviais, debe sen dúbida ser case
tan antiga como a aparición do home a industria de construción e reparación de
embarcacións, aínda que ata o momento só poidamos remontarnos no tempo ata o
achado dunha embarcación prehistórica —a monóxila— feita do tronco oco dunha
árbore e desenterrada dos lodos prehistóricos da lagoa de Antela.
Desde este remotísimo descubrimento, e
sen dubidar de que a construción de embarcacións mantívose activa en tantos
séculos escuros, a falla de máis datos obríganos a un prodixioso salto na
historia, que nos leva aos albores do século XII, cando as correrías dos
normandos e os zanfoneos dos árabes fixeron, por fin, pensar en defenderse no
mesmo elemento mariño.
Iniciada a actividade naval militar en
Cantabria e Cataluña, a mariña castelá tomou en Galicia as súas primeiras
naves, e contra 1122 Diego Xelmírez emprendeu a tarefa de crear a primeira
escuadra galega: ordenou traer desde Arlés, Pisa e Xénova expertos en
construción de barcos e homes entendidos nas prácticas do mar. Coa construción
baixo a dirección do Mestre Oggiero de dúas galeras birremes nos afamados
estaleiros de Iria Flavia, establécese a primeira base naval da armada galega
no mar de Arousa.
O inicio do século XIV trasládanos á
desembocadura do río Belelle no mar de Xuvia (ría de Ferrol) para encontrar os
arsenais nos que os carpinteiros de Neda construíron as naves que en 1340 ó
mando do capitán Alonso Esquío combateron ós berberiscos no sur peninsular, e
cuxa destacada intervención moveu á concesión por Alfonso XI de foros e
privilexios á Vila de Neda. Pese a que a crecente competencia ferrolá desde
mediados do século XVIII e a paulatina redución do calado da ría aceleraron a
súa decadencia, estes estaleiros nedenses mantiveron unha notable actividade
ata principios do século XX, para ceder finalmente a testemuña ós grandes
estaleiros de Maniños, Barallobre e Perlío.
A finais do século XV, cando os Reis
Católicos confirmaron á Vila de Foz as súas franquías e inmunidades, os seus
estaleiros eran dos principais de Galicia, destacando tamén nesta época os
estaleiros de Pontevedra e –xa a principios do XVI– os diversos arsenais da ría
ferrolá fundamentalmente ocupados na construción de galeras para a armada real.
Se xa en 1346 se documenta o transporte
de vino desde Ribadeo a Brest, non é de estrañar a solvencia dos seus
varadoiros, nos que tamén se reparaban as embarcacións que transportaban
madeira a Andalucía e retornaban co valioso sal.
Noia é outra poboación costeira que
destaca no século XVII, xunto coas xa nomeadas, pola calidade dos seus
estaleiros e varadoiros.
Serían sen dúbida numerosos, ademais
destes establecementos principais, os pequenos estaleiros e carpinteiros de
ribeira diseminados polas praias e enseadas galegas. Recoñécese incluso como
frecuente o desprazamento dos mestres y operarios de algún estaleiros para a
construción das embarcacións que se demandaban en circunstanciais emprazamentos
que se configuraban como varadoiros para a ocasión.
A pesca e o comercio marítimo souberon
das gabarras de Viveiro; as bucetas de O Barqueiro; os barlotes de Bares; os
traiñóns de Cariño; os trincados de Maniños e Barallobre; as miñotas de Miño e
as sadiñas de Sada; as lanchas de Fisterra; os galeóns de Arousa; as batelas e
os anguleiros de Tui; os botes, menuetas, chalupas, gamelas, chalanas,
faluchos,pataches… e, por suposto, as dornas: dornas de O Son, de Castiñeiras,
de O Grove…
Estaleiros de Domaio, de Baldráns, de
Cangas, de Coruxo… Afortunadamente podemos recuperar a memoria de moitos deles
nos traballos de Staffan Mörling ou de José María de Juan-García. Non son, sen
embargo, demasiados os que hoxe sobreviven á invasión do ferro e, sobre todo,
dos plásticos. Aínda estamos a tempo de fixar no recordo a pegada da maioría de
eles e aínda quizá de conservar a memoria viva do traballo amoroso de algún dos
que, en verbas de Antón Avilés de Taramancos, “na outra banda do mar…están a
construír a torre de cristal da miña infancia”.
Construcción:
Descrición:
Coñecido como Estaleiro da Banda
do Rio ou Carpintería de Purro, na praia da Banda do Río de Bueu, foi fundado
no ano 1920 por José del Río Casal, a partires dunha concesión administrativa
para ocupación de espazo público. A elección desta situación para o obradoiro
non é casual pois nesta parte de Bueu dábanse as condicións idóneas: un entorno
xeográfico con bo subministro de materias primas; unhas boas comunicacións por
estar no centro da vila; unha praia abrigada que facilitaba facer as botaduras
con seguridade; e súa proximidade á desembocadura do río Bispo que permitía facer
o curado da madeira no seu cauce.
Amosa unha configuración común a
tódalas carpinterías de ribeira que comprende unha pequena oficina, unha zona
para o trazado de proxectos, outra para a elaboración das pezas de madeira onde
se axeitan o banco e as ferramentas, o gran alboio para a construción dos
cascos baixo teito, unha área descuberta para almacenamento e secado da madeira
e o varadoiro con vías, orientado sempre en perpendicular á beiramar.
A parte máis antiga da carpintería
está formada por unha estrutura cuberta por un tellado a dúas augas asentado
sobre columnas de pedra onde se ergue un pequeno faio no que está instalada a
máquina de afiado da serra de cinta. Noutra parte do taller sitúase a pequena
oficina que tamén era utilizada para agochar as ferramentas, este elemento foi
engadido nunha ampliación levada a cabo despois do ano 1938, cando, ó morrer o
anterior carpinteiro, o estaleiro foi comprado por Rosa Cortizo Cerviño para o
seu fillo, José González Cortizo, coñecido como Purro e que había aprendido o oficio no estaleiro de José de Rafael,
tamén en Bueu.
Con este novo propietario a
carpintería incrementou a súa actividade pasando dunha produción exclusiva de
embarcacións de pequeno porte, gamelas, chalanas, lanchas xeiteiras, botes
polbeiros e traíñas, a construír tamén embarcacións de maiores dimensións. Coa
implantación do motor como método de propulsión principal, as embarcacións
aumentaron as súas dimensións, o que fixo necesario a ampliación das
instalacións en varias fases e conferiulle o aspecto tan peculiar que amosa na
actualidade. A implantación das bateas nas Rías Baixas abriu un novo mercado
para os carpinteiros de ribeira, e supuxo unha carga de traballo importante
durante os derradeiros anos.
No ano 1975 ampliáronse as instalacións
cara as testas NW e N, pero cando en 1988 se constrúe un muro de abrigo para
protexer as casas das marusías, perdéronse as vías de varada do estaleiro; unha
estrutura que estaba composta por tres raís paralelos, dous laterais a mesma
altura e o central máis baixo, a modo de “v”, que se fincaban nuns pilotes de
madeira enterrados na area da praia, as vías tiñan unha lonxitude aproximada de
trinta metros cara a liña de mar. A perda desta infraestrutura básica provocou
que entre os anos 1986 e 1988 se construísen dous barcos a carón do porto
pesqueiro, nun alboio levantado para esta obra. Porén o estaleiro, vella
testemuña de mellores tempos, mantense no seu emprazamento de sempre rodeado
dun valado de madeira e separado do seu mar por un parapeto de pedra.
Sendo o seu derradeiro propietario
don Manuel González Ferradás, igual que o seu pai coñecido tamén como Purro, a carpintería de ribeira, fechou
a súa actividade construtora aló polo ano 2003, despois de ter feito como
derradeira encarga o bote xeiteiro Os
Galos para a Asociación de Amigos das Embarcacións Tradicionais “Os Galos”,
do mesmo Bueu.
As meirandes embarcacións
construídas foran o Sibaniño, no ano
1973, de dezanove metros de quilla, e o Galaico,
en 1981, de dezaoito metros de quilla. O propietario aínda lembráballe ó
profesor José María de Juan-García Aguado no ano 2001 como a reparación dun
pesqueiro que viñera de Cádiz no ano 1960, de nome Tigre, lles obrigara a cavar un dique na area da praia para
poderlle cambiar a popa de galo.
A partires da finalización da súa actividade principal no dito ano de 2003, quedou
aberta unha fronte de loita pola conservación do estaleiro de Purro, batalla
que no decurso do tempo non atopou máis que atrancos nun esforzo, ata no hai
moito baldeiro, levado en solitario polos Galos, que teñen o firme
convencemento de que é necesario a implicación das diferentes administracións
para garantir a presenza do sector da carpintería de ribeira en Bueu có fin de
tecer unha relación entre a produción económica e a potenciación turística da
bisbarra, dándolle pulo, xunto coa navegación tradicional, como un dos
elementos sobre o que construír a dinamización turística e a preservación do
patrimonio cultural e etnográfico.
Mentres se debate esta loita
conservacionista o estaleiro está sendo utilizado pola asociación como
obradoiro para realizar o mantemento da pequena flota de embarcacións
tradicionais da que dispoñen. Mágoa que esta asociación non poida contar nin
coa disposición económica para facer os amaños necesarios nin cunha mínima
capacidade decisoria sobre o uso final das instalacións.
O estaleiro está ligado intimamente
á historia marítima recente do concello de Bueu: foi a derradeira carpintería
de ribeira en activo, nela traballaron e se formaron moitos profesionais e nela
construíronse infinidade de embarcacións, moitas aínda en activo. O seu
peculiar aspecto converteuse en parte da paisaxe urbana de Bueu, actuando como
referente patrimonial do concello unha vez destruídos aqueles outros bens
arquitectónicos susceptibles de ocupar tal lugar. De tal xeito, nalgunhas
páxinas web aparece como un símbolo tanto do pobo como da carpintería de
ribeira e son varias as publicacións que fan mención a este taller. Polo tanto,
a súa imaxe é un vínculo de unión entre o pobo de Bueu e o seu pasado, sempre
vencellado ós barcos e o mar, que pode significar o reencontro cunhas orixes
culturais que, a pesares da súa proximidade, son ignorados por unha boa parte
da poboación.
Non se trata de aplicar ningunha
solución preexistente senón estudar unha solución adaptada ó entorno social no
que se pretende desenvolver a proposta. Para iso, resulta preciso iniciar un
proceso que valore todas aquelas ideas sobre as diferentes actividades ou usos
que se poderían dar ó estaleiro de Purro. Que dúbida cabe que o primeiro paso sería
a realización dun amplo proxecto, no que se valorasen tódalas posibilidades,
así como as reformas ou arranxos precisos para o desenvolvemento das diferentes
actividades ás que se poida dedicar, sempre coa temática da carpintería de
ribeira como eixo vertebrador.
Proponse tamén o desenvolvemento
dunha parte viva, na que se trataría de ter unha actividade que permita ós
visitantes poder seguir de cerca a construción dunha embarcación tradicional, e
poder observar as diferentes técnicas que empregan estes artesáns, para crear
unha embarcación a partir dunha morea de táboas.
O estaleiro de Purro podería constituír,
xunto co próximo Museo Massó e coa flota de embarcacións tradicionais da
Asociación Os Galos, un referente da cultura marítima convertendo o obradoiro
nun elemento único e diferenciador do pobo, favorecendo o seu atractivo
cultural e turístico. Co pulo que está a vivir o patrimonio marítimo a escala
europea, dende a Bretaña francesa ós países nórdicos, a recuperación do taller
de Purro contribuiría a estabilizar e focalizar en Bueu esta oferta na bisbarra
do Morrazo, creándose ó tempo os elementos necesarios para afrontar o liderado
como referente nas Rías Baixas e en Galicia.
Referencias Bibliográficas:
Asociación
de Amigos das Embarcacións Tradicionais “Os Galos”. “Eu em-purro Bueu. Proposta
de rehabilitación da carpintería de ribeira de Purro”. O apupo, Boletín Informativo da Federación Galega pola Cultura Marítima
e Fluvial, ano VII, número 12, maio 2007.
Asociación
de Amigos das Embarcacións Tradicionais “Os Galos”. O estaleiro de Purro en Bueu. Documento remitido a Buxa polo seu
secretario, Suso Framil, o 14 de maio do 2010.
Artime
González, A., 1994, La construcción de
embarcaciones de madera en los astilleros de Luanco, Museo Marítimo de
Asturias, Luanco. ISBN 84-86889-28-6.
Ateneo Ferrolán,
2009. A construcción naval na ría de Ferrol. Cadernos do Ateneo
Ferrolán, ano XX, número 19, 2008. Ferrol: Ateneo Ferrolán. DL C-994-2009. ISBN
84-933518-1-4.
Blanco
García, J., 2008, Guía de las
embarcaciones tradicionales gallegas, Edicións Nigra Trea, Vigo. DL
VG-488-2009. ISBN 978-84-95364-87-6.
Carmona
Badía, X., 2009. “El patrimonio industrial maritimo en Galicia: la conservación
de la pesca y la construcción naval”. Il
patrimonio industriale marítimo in Italia e Spagna. Strutture e territorio
(Genova, 26-27 ottobre 2007). A cura di A. di Vittorio, C. Barciela López,
P. Massa. Societá Italiana degli Storici dell’Economia e Universitá degli Studi
di Genova, p. 167-186. Genova: De Ferrari.
Gil
de Bernabé López, J.M., 1984, Guía de
Gil
de Bernabé López, J.M., 1988, Galicia
Artesana, Editorial Everest, León. DL LE-39-1988, ISBN 84-241-4652-2.
Juan-García
Aguado, J.M. de, 2001, La carpintería de ribera en Galicia (1940-2000),
Servicio de Publicacións da Universidade da Coruña, Monografías nº 95, Coruña.
ISBN 84-95322-71-4.
Juan-García
Aguado, J.M. de, 2009. “A carpintaría de ribeira na ría de Ferrol”. A
construcción naval na ría de Ferrol. Cadernos do Ateneo Ferrolán, ano XX,
número 19, 2008. Ferrol: Ateneo Ferrolán, p. 33-40.
DL C-994-2009. ISBN 84-933518-1-4.
Juan-García
Aguado, J.M. de, y Rey Fraguela, J., 2008, “Los últimos carpinteros de ribera
de Neda”, Revista de Neda: anuario
cultural do Concello de Neda, nº 11, dir. Manuel Pérez Grueiro, Concello de
Neda, Neda, Coruña, p. 76-85. ISSN 1139-1154.
Lara Coira, M.,
2009, “Carpintería de ribera”, Gallegos,
número 5, I trimestre 2009, Ensenada de Ézaro, Santiago de Compostela, p.
94-97.
D.L. VG-549-2008. ISSN 1889-2590.
Lorenzo
Fernández, X., 1962, “Etnografía:
cultura material. Os oficios: Carpinteiros de ribeira”, Historia de Galiza, Ramón Otero Pedrayo (dir.), Editorial Nós,
Buenos Aires. Vol. II, p. 486-491. ISBN 84-9745-054-X.
Lorenzo
Fernández, X., 1983, Os oficios,
Biblioteca Básica da Cultura Galega, Editorial Galaxia, Vigo. p. 301-305. ISBN
84-7154-425-3.
Máiz
Vázquez, B., y Freire Hermida, E., 2009, As
embarcacións tradicionais: do Arco Ártabro a Ribadeo, Museo do Pobo Galego
e Edicións Embora, Ferrol. ISBN 978-84-92644-01-8.
Massó y
García-Figueroa, J.M., 1992, Barcos en
Galicia. De la prehistoria hasta hoy y del Miño al Finisterre, (2ª ed.),
Diputación Provincial de Pontevedra, Pontevedra. ISBN
84-86845-7629-3.
Mörling,
S., 1989, As embarcacións tradicionais de
Galicia, Dirección Xeral de Formación e Promoción Social da Xunta de
Galicia, Santiago de Compostela. ISBN 84-453-0070-9.
Mörling,
S., 2005, Lanchas e dornas. A
estabilidade cultural e a morfoloxía das embarcacións na costa occidental de
Galicia, Consellería de Pesca e Asuntos Marítimos da Xunta de Galicia,
Santiago de Compostela. ISBN 84-453-4130-8.
Pazos Pérez,
L.J., 2009. Aqueles barcos de madeira. Carpinterías de ribeira. Apuntamentos
para una memoria marítima de Galicia. Pontevedra: Damaré Edicións. ISBN
978-84-935835-8-3.
Santalla
López, M., 2003, Las Reales Fábricas de
Ferrol. Gremios y barcos en el siglo XVIII, Ilustraciones de Xoán Braxe,
Edicións Embora, Ferrol. ISBN 84-95460-32-7.
Índice de mapas e planos:
Localización no Mapa Topográfico Nacional
1:25.000:
Folla 223-I Cangas // Fuso 29 // X 517,32 / Y 4.686,09