181 Caleiras de Moeche
- Provincia: A Coruña
- Concello: Moeche
- Parroquia: San Xurxo de Moeche
- Lugar: Moeche (San Xurxo)
- Paraxe: A Caleira
- Dirección: Non procede.
- Coord. Xeográficas - Latitude: 43.544737670989804
- Coord.Xeográficas - Lonxitude: -7.993626594543457
- Coordeadas UTM: Datum europeo 1950: Fuso 29 // X 581.421,08 m / Y 4.822.001,82 m
- Clasificación: Fabricación de cal
- CNAE: 08.11 Extracción de pedra ornamental e para a construción, calcaria, xeso, creta e lousa. 23.52 Fabricación de cal e xeso.
- Tipoloxía: Caleira industrial
- Comarca: Ferrol
- Marco Xeográfico: Val de Moeche
- Acceso:
Dende Ferrol colleremos a estrada C-642 que leva a Ortigueira e Viveiro e continuaremos por ela ata chegar a Balocos, onde apartaremos a dereita cara a San Xurxo de Moeche. Alí seguiremos uns douscentos metros pola carreteira que leva a Pereiro, e atoparemos un desvío na man esquerda que sube ó monte Cido, onde atópase a caleira co seu forno e demais instalacións.
Tipo de propiedade:
Visitable:
Xestión de visitas:
Historia:
Despois de quizais un millón de
anos de asimilación do lume como axente externo e como idea, hai uns trinta mil
ou corenta mil anos que os humanos comezaban coa domesticación daquela fonte de
luz e calor. E entre a queimadura sufrida polo contacto cunha arbore abatida
polo raio e o traslado dun cacho de madeira ardendo ó interior da cova puideran
transcorrer cen mil anos.
A calor está presente na base de numerosos procesos de transformación da materia, dende a preparación dos alimentos ata a fabricación dos máis sofisticados materiais cerámicos. Deixou anotado Plinio O Vello na súa Historia Natural: “O lume toma a area e devólvenos xa vidro, xa prata…Polo lume derrétense as pedras e fanse bronce; polo lume faise o ferro… Co lume calcinase esa pedra que forma o cemento que sostén as casas por riba das nosas cabezas… Hai varias cousas ás que é conveniente expor máis dunha vez á acción do lume. O mesmo material orixinal é unha cousa despois da primeira exposición, outra despois da segunda…”
O forno configúrase así como a ferramenta básica que controla o lume e na que se xera a calor necesaria para que teñan lugar as transformacións da materia, e foron multitude os diferentes tipos de fornos que os humanos construíron para darlle resposta ás súas diferentes necesidades de transformación da materia, dende os fornos para coce-lo pan ós fornos de fusión e tratamento de materiais, pasando por suposto polos fornos de calcinación de minerais siderúrxicos e polos fornos de elaboración do cal.
Quentarse, mellorar o confort e espantar ós animais puido ser o primeiro paso na manipulación do lume. Viría despois a preparación dos alimentos, coa necesaria aparición do instrumento ou recipiente que facilita a acción do calor e é contedor moitas veces imprescindíbel. O fogar, un sinxelo círculo protexido por pedras, foi a primeira estrutura elemental na domesticación do lume.
Todo comeza a primeira vez que
obsérvase con valor de pregunta o residuo que queda no lume dos seus fogares,
fose barro endurecido, po branco ou nódulos metálicos: o humano primitivo
comeza aquí unha busca que inda non rematou pero que foi deixando respostas e
significados. O barro endurecido pola acción da calor daría paso á cerámica; o
po branco levaría á preparación do cal e o xeso; e as brillantes gotas de metal
fundido solidificadas en nódulos metálicos serían o comezo da metalurxia.
Téñense recollidas noticias do
antiquísimo uso do cal (carbonato de calcio) e do xeso (sulfato de calcio),
primeiro para o uso simbólico e decorativo daquel po branco, despois, xa en
Babilonia como base para a realización de frescos e revocado de paredes. Fálase
tamén do uso polos asirios dun cemento ou aglomerante feito de cal, area e
calcaria triturada. Os exipcios empregaron o xeso finamente moído como estuco
para decoración e como escaiola para unir bloques na pirámide de Keops. Na
Anatolia e na India coñecíase asemade a cal na decoración e na construción.
Atopáranse restos dun forno de cal do 2.500 a.C.
O cal –e o xeso– está presente en
tódalas culturas dende os tempos máis remotos, e foran os romanos os que
difundirían o coñecemento da argamasa, un morteiro elaborado con cal aérea, cal
graxa, area e auga coñecido cando menos dende o século IV a.C. (opus caementicium) e amplamente
empregado en todo tipo de obras nos dous séculos derradeiros da república o II
e o I a.C.
O consumo de cal na Idade Media
faise abundantísimo, tanto que nalgúns casos mesmo denunciase a contaminación
nas vilas. No 1234 os homes libres de Newcastle foron autorizados para sacar
“carbón de mar” (carbón mineral, pedra que se queima en razón do seu contido en
xofre e materias graxas) que comeza daquela a empregarse nas caleiras en razón
da escaseza de leña. No século XV fálase de certa clase de terra que arde como
o carbón de leña.
En Galicia os peregrinos
transportaban pedra calcaria de Triacastela ata os fornos de Castañeda
(Figueiroa, Arzúa, Coruña), onde se fabricaba a cal para a construción da
catedral santiaguesa.
Os primeiros fornos de cal serían
moi semellantes ás carboeiras, construídos o ar amoreando pedra calcaria e
combustible e cubrindo ben o conxunto con arxila para mante-la calor e impedir
a entrada de aire.
A técnica da domesticación do lume
correría parella coas diferentes tentativas que se foron desenvolvendo na
construción de diversos tipos de fornos quer para a elaboración de cerámica, quer
para a fabricación do cal ou a metalurxia dos diversos metais, perfeccionando en
cada caso os deseños básicos de cada un deles para acadar a optimización dos
procesos, tanto no que atinxe á calidade do produto final como no que respecta
ó consumo de combustibles.
No canto do cal e das caleiras, os
primitivos fornos de calcinación artesanal da pedra calcaria a partires do rudimentario
braseiro no chan, foron desenvolvendo grandes estruturas cilíndricas verticais
habitualmente escavadas aproveitando a configuración do terreo nas proximidades
da canteira de calcaria, estruturas nas que se colocaban coidadosamente as
pedras calcarias mesturadas coa leña formando internamente unha cúpula a xeito
de falsa bóveda baixo a cal se prendía o lume que ía calcinar as pedras para
convertelas en cal.
Estes fornos descontinuos, que
pasarían do emprego da cada vez máis escasa leña á utilización do máis eficaz carbón
de leña, primeiro, e á do carbón mineral, despois, evolucionarían cara ós fornos
continuos, de meirande produtividade e menor consumo enerxético.
Descrición Xeral do Entorno:
A canteira e forno sitúanse na aba noroeste do monte Cido,
moi preto do Castelo de Moeche, e no fermoso e rico val de Moeche.
Construcción:
As primitivas canteiras de calcaria de Moeche
posiblemente iniciarían a explotación na década de 1750, levándose a pedra crúa
a cocer nas proximidades dos arsenais de Ferrol. As primeiras caleiras serían
construídas contra 1808. Xa na década de 1960 construiríase o forno continuo
aínda existente.
Abandono:
Finais da década de 1980.
Descrición:
Entre as serpentinas da área de
Moeche (A Coruña) afloran lentejones
de calcaria; trátase de calcarias moi recristalizadas e pouco potentes, que
foron utilizadas na elaboración de cal vivo.
E moi posible que se empregaran xa
dende a máis remota antigüidade, e mesmo dende a prehistoria, pero polo momento
nin a arqueoloxía nin os historiadores poden amosar pegadas ou datos fidedignos
da súa explotación.
No ano 1833 era o famoso xeólogo
alemán Guillermo Schulz quen deixaba unha referencia moi precisa do mineral
calcario de Moeche “mármol primitivo blanco y hermoso, formando una gran veta
en San Jorge de Moeche. También
lo hay azulado y ambos son buenos para hacer cal, aunque el combustible la hace
muy costosa”.
A referencia máis antiga da
calcaria que atópase no val de Moeche procede de José Bermúdez Marina, quen o 9
de febreiro do 1750 informa que canda Jacinto de Aróstegui e algúns prácticos
atoparan unha canteira de pedra de cal nos termos da xurisdición de San
Sadorniño, a media legua de Neda e a dúas leguas da enseada de Caranza, onde
precisaban o cal para a construción dos novos arsenais ferroláns.
Nos primeiros anos do século XIX o
mineraloxista alemán Juan Pensel traballaba no Arsenal de Ferrol como
responsable do forno de reverbero, e facía compatible o seu traballo como
mestre fundidor co traballo de campo na procura de afloramentos de minerais. Nunha
das súas excursións dacabalo vai descubrir “vetas de piedra calcar” no termo
municipal de Neda. E será no 1806 cando atope no próximo val de Moeche un banco
de calcaria que estima moi superior en abundancia e calidade ao achado en Neda.
Pensel vai obter contra 1808 exclusiva
da fabricación e a posesión dos terreos para asentar a industria de fabricación
de cal, de grande necesidade na construción e na industria de curtidos. Pensel
casaría en 1812 con Damiana Somalo, filla do propietario da fábrica de curtidos
da Florida, en Neda. Non sabemos onde atopábase o forno de calcinación, que
podería ser o da Ferrería, no límite entre os termos municipais de Moeche e As
Somozas.
A estrutura que levanta Pensel, a
fábrica de cal, contaba con casa, almacéns e outros edificios que configuraban
a unidade produtiva. Na primeira etapa, de uns dez anos, a fábrica de cal de
Pensel tiña unha produción de dez a doce fornadas anuais, efectuadas na época
de bo tempo, é dicir entre xuño e outubro.
A crecente dificultade para conseguir
a gran cantidade de combustible necesario (uns doce carros de leña de toxo para
cada cocedura) e a caída do consumo de cal pola decadencia das fábricas de
curtidos da zona fan que contra 1816 a produción se reduza a metade.
Por estes anos Francisco Alvariño
Sisero, veciño de Pumariño, na freguesía de San Xurxo de Moeche, solicita
permiso para outra explotación de calcaria e fabricación de cal para o
Departamento da Mariña de Ferrol. Despois dun longo preito con Pensel, que
pretendía manter a súa exclusiva obtén autorización para o beneficio da
calcaria.
Na metade do século (1846-1850) o
documento de don Pascual Madoz describe que no municipio de Moeche existen dúas
canteiras e fábricas de cal, e cabe supoñer que unha sería a de Pensel e a
outra a de Alvariño.
Unha neta de don Juan Adams Pensel
casaría con don José Espantoso, quen pasaría a dirixir a caleira de Moeche.
Na década de 1960 o empresario de
As Pontes de García Rodríguez, don Roberto Tojeiro Díaz, mercaría á familia
Espantoso o monte Cido, os terreos nos que se atopa a canteira de calcaria e o
vello forno de cal daría paso ao novo proceso de calcinación industrial con
carbón mineral: nacía a empresa “Caleras de Moeche, S.A.”.
O novo forno tiña unha capacidade
de oitenta toneladas, e producía trinta toneladas diarias de cal. Trátase dunha
sinxela estrutura adaptada á funcionalidade do sistema industrial
Na década de 1980 aínda a empresa
“Caleras de Moeche, S.A.” explotaba as calcarias para a elaboración de cal, que
despois empregábase nas instalacións da Empresa Nacional de Fertilizantes
(ENFERSA) en As Pontes de García Rodríguez. A empresa de Moeche transformaría
despois a súa actividade principal para dedicarse á silvicultura e explotación
forestal, plantando de eucaliptos todo o monte Cido.
Tempo de uso:
As caleiras primitivas traballaban nos meses de menos
chuvias, entre xuño e outubro. As modernas caleiras poden traballar todo o ano.
Sistema de produción:
Na primitiva explotación a pedra
calcaría (calcita, carbonato cálcico, CO3Ca) arrancábase na canteira
e levábase a cocer en braseiros elementais preparados no chan ou nos fornos
dispostos con tal propósito nas proximidades de Ferrol ou no mesmo Arsenal
ferrolán. Máis adiante, construiríase a caleira a carón da canteira.
A caleira, unha estrutura
cilíndrica de uns catro ou cinco metros de altura e uns tres metros de diámetro
interior no pe, era escavada na terra aproveitando a configuración do terreo
nas proximidades da canteira de calcaria. Na base, no seu fronte tiña unha
abertura ou porta, a boqueira, e no
interior un zócalo, a zapata, todo en
derredor da parede interior e cun metro de altura sobre o chan.
As calcarias ou pedras de cal
íanse pondo en fiadas encol da zapata e ó chegar a certo alto as fiadas ían
estreitándose formando unha falsa bóveda que enchíase de calcaria por riba ata
chegar á mesma cheminea do forno. Baixo a bóveda metíase despois a leña de toxo
que se tiña preparada e púñaselle lume que cumpría manter prendido cerca de
tres días, ata calcinar as pedras para convertelas en cal. Segundo Xaquín
Lorenzo cada fornada viña consumindo uns cincuenta carros de toxo.
Se co forno ardendo ameazase
chuvia tiñan que tapalo ben con xestas por riba, pois de chegar a auga ó cal que
se ía formando no interior poderíase fende-lo forno e quedar inutilizado pola
forte dilatación que sofre o cal vivo (óxido de calcio, CaO) ao reaccionar coa achega
e incorporación da auga para dar cal apagado ou cal morto (hidróxido de calcio,
Ca(OH)2). Con posterioridade, o cal apagado vai reaccionando co anhídrido
carbónico do aire (CO2) para cristalizar a xeito de carbonato
cálcico (CO3Ca).
Rematado o proceso deixábase
enfréa-lo forno e tirábase o cal con pás botándoa en cestos para vendela ós que
alí ían a procurala ou para levala á venda ó seu destino final. O forno podía
ser propio, mailo corrente, como se facía cos de cerámica, é que se alugase
para preparar a fornada.
No moderno forno de cal de Moeche as
cargas facíanse por riba e íanse alternando as capas de calcaria con capas de
carbón mineral, de espesor decrecente ó irse apartando da boca. O cal obtido
íase amoreando nos tres silos situados diante do forno, dende os que se
descargaba en camións para o transporte os lugares de destino.
No canto de da caleira de Moeche, explotárase
primeiramente de maneira superficial, e houbo que ir afondando co avance da
explotación. No segundo nivel construírase un túnel para a comunicación da
canteira co forno. Ó continuar profundando na procura da veta calcaria, un
segundo túnel sería necesario, e máis adiante aínda construiríase un terceiro
túnel de comunicación para a extracción do mineral e o seu transporte á boca do
forno.
Actividades laborais:
Emprego:
Materias Primas:
Pedra calcaria (calcita, carbonato cálcico, CO3Ca).
Produtos Elaborados:
Cal vivo (óxido de calcio, CaO).
Distribución e comercialización:
Referencias Bibliográficas:
Bauer,
G. (Georgius Agricola), 1556. De re
metallica. Fasimil del Max-Planck-Institut für Wissenschaftsgeschichte (Instituto
Max Planck para la Historia de la Ciencia) [en línea]. Dispoñible na Internet: http://libcoll.mpiwg-berlin.mpd.de [Último acceso 7 de abril del 2011].
Fernández Negral, J., 2009. Estudio
del proceso de calcinación y uso de la cal en los procesos sidero-metalúrgicos
y en la construcción. Análisis de los procesos de obtención y de la estructura
de los hornos.
Tesis Doctoral (inédita). Departamento de Enxeñaría Industrial II, Universidade
da Coruña.
Lara Coira, M., 2010: “La minería y el patrimonio minero
en Galicia”. Tierra y tecnología, revista
de información geológica, número 36, segundo semestre 2009, Madrid: Ilustre
Colegio Oficial de Geólogos, p. 65-76. DL-M-10.137-1992. ISSN 1131-5016.
Lorenzo Fernández, X., 1962, “Etnografía: cultura material. Os oficios: Caleiros”, Historia de Galiza, Ramón Otero Pedrayo
(dir.), Buenos Aires: Editorial Nós, vol. II, O home-II,
p. 530-531.
Lorenzo Fernández, X., 1983. “Caleiros”, Os oficios, Biblioteca Básica da Cultura
Galega, Vigo: Editorial Galaxia, p. 95-97. DL VG-18-1983. ISBN 84-7154-425-3.
Madoz
Ibáñez, P., 1846-1850, Diccionario
geográfico-estadístico-histórico de España y sus posesiones de Ultramar, 16
vol., Establecimiento tipográfico de P. Madoz y L. Sagasti, Madrid, (vol 6-9:
Est. Tipografico-Literario Universal; vols 10-11: Imprenta al Diccionario
Geográfico, á cargo de José Rojas; vols 12-16: Imprenta del Diccionario
geográfico estadístico-histórico de Pascual Madoz). Existe una versión
digitalizada y de libre acceso a través de
Manual del Ingeniero, 1942, Enciclopedia del Ingeniero y del Arquitecto
compilada por
Meijide
Pardo, A., 1996, “Descubrimiento y explotación de las calizas de Moeche por el
mineralogista alemán J.A. Pensel (1806-1818)”, Anuario Brigantino, nº 19, p. 171-184, Betanzos. ISSN 1130-7625.
La minería de Galicia, 1991, Santiago de
Compostela: Dirección Xeral de Industria de
Mirre,
J.C., 1990, Guía dos minerais de Galicia,
Vigo: Galaxia. D.L. VG-328-1990. ISBN 84-7154-729-5.
Schulz,
G., 1835, Descripción geognóstica del
Reino de Galicia, acompañada de un mapa petrográfico de este país,
Herederos de Collado, Madrid, ed. facsimilar de 1985 da Área de Xeoloxía e
Minería do Seminario de Estudos Galegos, Sada (Coruña): Ediciós do Castro.
Índice de mapas e planos:
Localización no Mapa Topográfico Nacional 1:25.000: Folla 7-IV As
Somozas // Datum europeo 1950 (ED50) Fuso 29 / X 581.421,08 m / Y 4.822.001,82 m