186 Fábrica de Aranza
- Provincia: Lugo
- Concello: Baralla
- Parroquia: Santiago de Aranza
- Lugar: Aranza de Baixo
- Paraxe: A Cova (Piscifactoría Río Neira)
- Dirección: Non procede
- Coord. Xeográficas - Latitude: 42.868227019975784
- Coord.Xeográficas - Lonxitude: -7.280073165893555
- Coordeadas UTM: Datum europeo 1950: Fuso 29 // X 640.620,24 m / Y 4.747.831,30 m
- Clasificación: Fabricación de papel
- CNAE: 17.12 Fabricación de papel e cartón.
- Tipoloxía: Muíño papeleiro de tinas
- Comarca: Os Ancares
- Marco Xeográfico: Aba do Monte de Francos, no final do val de Neira
- Ámbito: Rural
- Acceso:
Unha vez en Baralla colleremos a estrada que leva a Aranza e Pol e a uns tres quilómetros, pasado o desvío do pazo e da igrexa e xa entre as casas de Aranza de Baixo, apartaremos á dereita camiño do couto troiteiro da Cova. A iso dun quilómetro de comezado o desvío atoparemos a piscifactoría que fora muíño fariñeiro e fábrica de papel.
Tipo de propiedade:
Visitable:
Xestión de visitas:
Historia:
Alá polo ano 105, Tsai Tsai-Lun
lograba crear en Lei-Lan (Honan, no corazón de China) o primeiro papel
fabricado a partir de fibras vexetais extraídas de trapos, redes de pescar, cáñamo
e bambú. O seu coñecemento foi estendéndose pola ruta da seda, ata que no ano
751 os musulmáns capturaban preto de Samarcanda (Uzbekistán) a algúns artesáns
chineses coñecedores do oficio, que o ensinarían ós seus captores a cambio dun
trato privilexiado. Desta forma, o papel –ata entón monopolio dos chineses–
pasou a Occidente da man dos árabes, que instalaron muíños papeleiros en toda a
Asia Menor e norte de África.
Despois da gran fábrica de papel
que se construía en Bagdad (Iraq) no ano 793, a fabricación chegaba á Meca, a
Damasco e, vía O Cairo, a Fez (Marrocos), onde no ano 1200 contaban con
catrocentas moas de refinamento en funcionamento. A través de Córdoba e Toledo
(España) o papel introduciríase en Europa. A primeira referencia indiscutible
dun muíño papeleiro na Península Ibérica é do ano 1056 nas aforas de Xàtiva
(Valencia), onde Abu-Masafya contaba con vinte operarios que empregaban liño de
Valencia como materia prima, fabricando un papel de gran calidade.
En 1189 introducíase a fabricación
de papel en Francia, e en 1230 en Italia (Xénova, Bologna e Fabriano). O ano
1390 funcionaba en Nuremberg o primeiro muíño papeleiro alemán. Cara a 1494
introducíase en Inglaterra, e a finais do século XVI chegaba a Rusia, Estados
Unidos e Suecia. Foi lenta a súa introdución en Europa, tanto polo seu prezo
(durante moito tempo equiparable ó do pergameo) como polos prexuízos de quen
consideraban o seu uso indebido por estar fabricado por xudeus e árabes.
O proceso tradicional de
fabricación do papel pode describirse diferenciado nas súas cinco etapas
fundamentais:
- preparación da materia prima (fundamentalmente trapos): aventado,
clasificación, esgazado, abatanado e fermentación en auga con cal;
- preparación da pasta nas pilas desfacendo as fibras cos mazos do muíño:
trinchado, afinado e refinado;
- formación das follas de papel na tina, filtrando coidadosamente co molde
ou forma a pasta xa refinada;
- prensado das follas para eliminar a auga residual;
- secado das follas.
Os talleres contaban tamén con
zonas complementarias, como a de encolado (aplicación a unha ou ás dúas caras
da folla dunha fina capa dunha pasta especial –carga– para igualar a
superficie, encher os poros e dar un certo grao de impermeabilidade ó papel,
facéndoo resistente á auga e ós líquidos) e a de satinado (modificación do
acabado do papel xa seco pasándoo mediante golpes de maza, brunido con pedra ou
madeira puída, ou prensado con calor) para a preparación final de papel de
diferentes calidades: fino ou groso, forte ou brando, absorbente ou repelente,
secante, de escritura ou de impresión.
Agás a introdución da pila
holandesa ou cilindro refinador (desfibradora inventada en Holanda cara a 1670)
como único perfeccionamento significativo, este lento e laborioso proceso
tradicional de fabricación manual do papel duraría ata finais do século XVIII.
Corría o ano de 1803 cando se puña en marcha en Frogmore (Inglaterra) a
primeira máquina de táboa plana para a fabricación de papel continuo. Tratábase
dunha evolución do prototipo construído en 1798 polo francés Louis-Nicolas
Robert, perfeccionado fundamentalmente polo mecánico inglés Bryan Donkin
financiado nos seus traballos polos irmáns Fourdrinier.
O papel non saía seco da máquina,
polo que había que cortalo e secalo ó aire, á maneira tradicional. As
innovacións continuaron e en 1819 instalábanse en Weida (Turingia) os primeiros
cilindros secadores por vapor, e en 1826 Canson introducía en Vidalon (Francia)
os cilindros ou prensas aspirantes, mentres que Bergue en 1840 completaba cos
areeiros as innovacións no proceso, co que a máquina continua podía
considerarse plenamente desenvolta.
O acceso a tecnoloxía estranxeira
implicaba a chegada de man de obra cualificada, pois as deficiencias do ensino
técnico español obrigaban á presenza de especialistas foráneos para a formación
de expertos españois.
A variedade de pedidos de produtos
diferenciados –e sempre a escala reducida– determinaban a lentitude da
mecanización e a súa baixa especialización, polo que en España se buscaba a
versatilidade da pequena fábrica, para poder pasar dun produto a outro con
axilidade.
Outra dificultade radicaba na
dotación de recursos, tanto materias primas como enerxía. Os contemporáneos
queixábanse dos altos prezos dos trapos (35 ó 50% do custo do papel) e produtos
químicos, e das dificultades de circulación dun produto de baixo valor e
elevado volume (os trapos) pola ineficiente rede de comunicacións españolas. Os
trapos importábanse de Italia e o cloruro de cal de Francia, necesitándose
ademais cloro, acedos, sosa cáustica, resinas e colorantes, de orixes diversas
aínda que tamén maioritariamente importados.
Como referencia da situación,
preséntase a continuación unha comparación do ano 1866 entre os custos de
fabricación de 700 toneladas de papel continuo en España e no estranxeiro,
valorados en reais de vélaro.
|
España |
Estranxeiro |
Trapo e alpargatas |
1.363.600 |
974.000 |
Produtos químicos |
397.124 |
216.962 |
Carbón |
269.500 |
30.800 |
Man de obra |
154.000 |
134.000 |
Outros |
621.927 |
356.290 |
Total |
2.806.151 |
1.712.052 |
Ante esta insostible situación
buscáronse sucedáneos dos trapos, como o esparto, iniciativa que fracasou polos
altos custos de transformación en España (necesitábase para iso carbón, cloruro
de cal e sosa), mentres que os atochales españois alimentaban as fábricas
británicas, con custos de transformación sensiblemente menores pola
significativa economía do carbón e dos produtos químicos.
A elaboración de pasta de madeira,
iniciada en España cara a 1880, supuxo o principio da fin das vellas papeleiras
que empregaban trapos como materia prima, que non puideron resistir o pulo da
nova competencia.
Descrición Xeral do Entorno:
A fábrica situárase na ribeira esquerda do río Neira, do
que fornecíase da auga requirida para o seu funcionamento. O emprazamento elixido
é un encaixe do río no mesmo final do val de Neira.
Construcción:
Antes de 1845.
Abandono:
Funcionaba aínda a finais da década de 1920. Abandonada
como fábrica de papel transformouse en muíño fariñeiro, primeiro, en central
hidroeléctrica, despois, e, xa na década de 1970, en piscifactoría, aínda en
funcionamento no 2011.
Descrición:
Fora propiedade
dos señores do Pazo de Láncara, don Gonzalo Osorio de Albaredo e dona Nicolasa
Pardo de Aguiar Armada.
Figura
citada no Dicionario de Madoz no ano 1845 e representada no mapa de Coello do
ano 1864. No Indicador de 1864 aparece como propiedade de Gonzalo
Osorio, e presentara mostras de papel na Exposición Rexional de Lugo de 1877.
Aínda
de que non aparece citada nos Bailly-Bailliere de 1833 a 1855, si figura
na edición de 1888, neste caso ó nome de Ramón García Blanes, que casara con
Isabel Osorio Pardo. Xa non aparece citada no Indicador de 1900.
Na
Xeografía de Lugo que escribira Manuel Amor Meilán entre 1923 e 1928, figura
citada cun aproveitamento hidráulico do río Neira de cen litros por segundo e
un salto de seis metros, cunha forza teórica de seis cabalos para a maquinaria
papeleira.
As
instalacións foran despois transformadas en muíño fariñeiro, derrubando varios
edificios e desmontándolle ó edificio principal o segundo piso, o que se
dedicaba ó secado do papel. Os píos de cantería de preparación da pasta foron
aproveitados polos veciños como lagares para a elaboración de sidra. Na visita
rendida por Gonzalo Gayoso en 1969 aínda recoñecíase a fasquía do edificio
principal, segundo pode verse nas súas fotografías.
Nos
primeiros anos da década de 1970 foi sometida a unha total reconversión,
transformándose en piscifactoría. Nos prados da augas arriba da fábrica, entre
o canal de derivación das augas e o río construíronse dende a presa os
estanques de cría e engorde das troitas, cunha lonxitude duns cento cincuenta
metros. Augas abaixo do edificio principal construíronse os estanques de
depuración. Aproveitouse aínda material para os cubertos e construíuse unha
vivenda para o encargado.
No mes
de maio do 2011 aínda estaba traballando unha pequena central hidroeléctrica
construída aproveitando a saída das augas baixo dos vellos muíños. Non queda
nada que lembre a antiga fábrica de papel.
A
captación das augas faise nunha revolta do río a medio dunha presa duns vinte
metros de anchura. A condución das augas derivadas faise por unha canle construída
na marxe esquerda do río, cunha lonxitude total
de algo máis de douscentos metros que permite obter un salto de uns seis metros
sobre o río para facer roular ás rodas que daban movemento ós mazos.
Trala
primeira reconversión das instalacións a auga facía virar os rodicios dos dous muíños
que se instalaran, un coa moa negreira e o outro coa moa albeira, ámbalas dúas
aínda no seu sitio. Coa segunda reconversión as augas moven unha turbina tipo
Francis de cámara aberta que acciona un pequeno alternador.
Tempo de uso:
Todo o ano, dependendo dos caudais do río.
Sistema de produción:
O proceso de fabricación de papel
iniciábase co escollido e clasificación dos trapos almacenados na fábrica
segundo as súas fins, reservándose os mellores para a fabricación de papel de
calidade superior, destinándose os peores para a fabricación de papel basto,
como a estraza ou a estracilla.
Acumulada a cantidade de trapos
suficiente para iniciar o proceso, botábanse nun pío chamado podredoiro,
engadindo auga e deixando levedar durante un período de tempo de cinco ou seis
semanas, ata que a calor da fermentación no podredoiro “queime ó meter a man”.
Finalizada esta operación, os trapos reducíanse manualmente a anacos pequenos,
con axuda dunha gadaña ou cortador, levándoos a continuación ó muíño de mazos.
Un apresamento construído nunha revolta
do río permitía derivar as augas a unha canle que tras un certo percorrido
conducíaas ás instalacións da fábrica de papel, onde vertíanse sobre unhas rodas
hidráulicas verticais de gran diámetro.
Estas rodas motrices, do tipo
gravitatorio de caixóns ou arcaduces, levaban os seus eixes erizados de levas
que accionaban os mazos, erguéndoos para bater nas pías ou tinas en que se
colocaran os trapos cortados unha vez finalizada a súa fermentación tras a
estancia no podredoiro.
Descoñécese a configuración precisa e
detallada das instalacións, aínda que pola época da súa construción é moi
posible que contase xa con tres grupos de mazos diferenciados para os labores
específicos de esfiañado (tres pías de esgazado), afinado (dúas pías de moenda)
e desleído (unha pía de homoxeneización da pasta) tras as que se obtiña a polpa
ou pasta para a elaboración do papel.
Unha vez obtida a pasta de papel
procedíase ó seu callado vertendo unha pequena cantidade de polpa nun molde
rectangular co fondo formado por unha fina malla de arames; a auga escoaba a
través do mallazo, pero as fibras nel retidas ó enfurtirse formaban unha folla
de papel sobre os arames. Esta operación manual era relativamente rápida,
rendendo uns oito pregos por minuto cun só operario.
Retirados os pregos dos moldes púñanse
en pía intercalando entre cada un uns panos de la branca sen costuras, os
saiales. Despois procedíase ó seu prensado, en prensa ou entre roletes, para
escoar a auga sobrante e finalmente deixábanse secar ó aire.
O papel xa seco, que pola súa gran
porosidade resulta moi absorbente (papel secante), sometíase entón ó proceso de
encolado co zume obtido ó espremer desperdicios xelatinosos de animais moi
cocidos. Tras un novo prensado para eliminar o exceso de cola e un novo secado
ó aire, o papel “de barba” (polas barbas que quedaban ó sacalo do molde)
traballábase no mazo de satinar para darlle o apresto final e eliminar as
irregularidades que puidese presentar o acabado, quedando xa listo para ser
empaquetado e posto á venda.
A chegada da electricidade supuxo a
modernización das instalacións, substituíndo as rodas motrices por unha turbina
hidráulica que arrastraba un xerador eléctrico, sendo entón a electricidade a
que movía a maquinaria fabril.
No propio proceso de elaboración da
pasta, a refinadora holandesa substituía ás vellas pías de esfiañado, afinado e
desleído. Nalgúns casos, a máquina semicontinua, tamén chamada redonda, de
bombo o picardo, substituía o traballo do alabrén (o operario que fai a folla
de papel na tina coa axuda do molde) e do poñedor (o que toma a forma do
alabrén e pon a folla sobre o sayal para levala á prensa) e con ela se
elaboraba o equivalente a catro ou cinco tinas.
Actividades laborais:
Man de obra principalmente feminina na limpeza e
preparación dos trapos. Persoal masculino na elaboración do papel, na atención
da maquinaria e nas oficinas.
Emprego:
Materias Primas:
Produtos Elaborados:
Distribución e comercialización:
Referencias Bibliográficas:
Amor Meilán, M., 1928. “Provincia de Lugo”, Geografía General del Reino de Galicia.
Francisco Carreras Candi (dir.), trece volúmenes, Barcelona: Editorial Alberto
Martín, reedición facsimilar en 1980, Ediciones Gallegas,
Asunción
Pastor, J., 2002, El papel. Técnicas y métodos tradicionales de elaboración,
Parramón, Barcelona. DL NA-2161-2001. ISBN 978-84-34224-10-0.
Bailly-Bailliere,
1879. Anuario del Comercio, de
Bailly-Bailliere e hijos, 1895 a 1937. Almanaque Bailly-Bailliere. Pequeña
enciclopedia popular de la vida práctica. Madrid: Bailly-Bailliere e
hijos.
Basanta
Campos, J.L., 1966, “Algunas adiciones a la historia de la fabricación de papel
en Galicia del siglo XVIII a nuestros días”, Investigación y Técnica del Papel, núm. 7, enero 1966, p. 23-41.
D.L. M-13650-1964.
Carmona
Badía, J., y Nadal Oller, J., 2005, El
empeño industrial de Galicia. 250 años de historia, 1750-2000, Fundación
Pedro Barrié de la Maza, Coruña. ISBN 84-95892-38-3.
Gayoso
Carreira, G., 1965, “La fabricación del papel en Galicia del siglo XVIII a
nuestros días”, Investigación y Técnica
del Papel, núm. 4, abril 1965, p. 193-223. D.L. M-13650-1964.
Gayoso
Carreira, G., 1994, Historia del papel en
España, 3 vol., 2ª ed. 2006, Servicio de Publicaciones de la Diputación
Provincial, Lugo. DL S-1455-2006. ISBN 84-8192-003-7.
Gutiérrez
i Poch, M., 1999. «L’Espagne est encore dans l’enfance. Máquinas francesas y
fracaso español. La mecanización de la industria papelera española
(1836-1880)», Doctor Jordi Nadal. La industrialització i el desenvolupament
econòmic d’Espanya. 2 vols.
Carreras, Pascual, Reher y Sudriá (eds.). Barcelona: Universitat de Barcelona, p. 1.258 y sigs. DL B-19.849-99. ISBN 84-475-2146-X.
Madoz
Ibáñez, P., 1846-1850, Diccionario
geográfico-estadístico-histórico de España y sus posesiones de Ultramar, 16
vol., Establecimiento tipográfico de P. Madoz y L. Sagasti, Madrid, (vol 6-9:
Est. Tipografico-Literario Universal; vols 10-11: Imprenta al Diccionario
Geográfico, á cargo de José Rojas; vols 12-16: Imprenta del Diccionario
geográfico estadístico-histórico de Pascual Madoz). Existe una versión
digitalizada y de libre acceso a través de la Biblioteca Virtual de Andalucía:
http://www.juntadeandalucia.es/cultura/bibliotecavirtualandalucia [Acceso 17 octubre 2009].
Ministerio
de Industria y Comercio, 1934. Estadísticas
de la industria del papel y cartón, publicadas de
Miñano
y Bedoya, S. de, 1826-1828, Diccionario
geográfico-estadístico de España y Portugal, 11 vol., Madrid: Imprenta de
Pierart-Peralta.
Servicio
Sindical de Estadística, 1966. Catálogo
de empresas y productos industriales, Madrid.
Verea y
Aguiar, J., 1803, Proyecto económico para
promover el establecimiento de fábricas de papel en el Reyno de Galicia,
Santiago de Compostela.
Viñas y
Campi, 1866, El indicador de España y de
sus posesiones ultramarinas, Barcelona.
Índice de mapas e planos:
Localización no Mapa Topográfico Nacional 1:25.000: Folla 98-IV Baralla
// Datum europeo 1950 (ED50) Fuso 29 // X 640.620,24 m
/ Y 4.747.831,30 m