191 Muíño da pólvora
- Provincia: A Coruña
- Concello: Neda
- Parroquia: Santa María de Neda
- Lugar: Cruz do Pouso
- Paraxe: Casa Millarengo
- Dirección: Cruz do Pouso, 24 – 15510 Neda (A Coruña)
- Coord. Xeográficas - Latitude: 43.50982400028219
- Coord.Xeográficas - Lonxitude: -8.122689127922058
- Coordeadas UTM: Datum europeo 1950: Fuso 29 // X 571.034,91 m / Y 4.818.023,88 m
- Clasificación: Muíño de vento
- CNAE: 20.51 Fabricación de explosivos (foguetería).
- Tipoloxía: Muíño de torre fixa e aspas non orientables.
- Comarca: Ferrol
- Marco Xeográfico: Monte de Ancos
- Ámbito: Rural
- Acceso: Dende Ferrol colleremos a estrada C-641 que por Xuvia
leva até As Pontes e Vilalba. Cruzado o río Grande e deixada atrás Xuvia, continuaremos
pola mesma estrada C-641 cara a Vilalba e a iso duns tres quilómetros máis
adiante, no lugar de Poulo, apartaremos á dereita pola carreteira de San Pedro
de Anca, pola que seguiremos pouco máis de douscentos metros ata chegar ó lugar
da Cruz do Pouso, localización das industrias pirotécnicas dos Millarengo e do
antigo muíño da pólvora.
Tipo de propiedade:
Visitable:
Xestión de visitas:
Na dirección antes recollida ou nos teléfonos 981 347 321
e 669 006 055 (María Jesús Millarengo). Na web http://lacasademiabuelo.es
Historia:
O aproveitamento da enerxía contida no
vento mediante a súa conversión en enerxía mecánica foi levado a cabo pola
humanidade desde a máis remota antigüidade. Se se exceptúa a enerxía de orixe
animal, cabe dicir que, xunto coa enerxía obtida dos cursos de auga, a enerxía
do vento foi o recurso enerxético natural máis antigo na historia das
civilizacións.
Ademais da navegación a vela (aparece
xa nun gravado exipcio do Alto Imperio, uns 4.500 anos a.C.) cara ao ano 1700
a.C., Hammurabi, rei de Babilonia, chegou a proxectar o regadío da rica meseta
de Mesopotamia con auxilio da enerxía eólica. Estes primitivos muíños de vento
debían de ser de eixo vertical, sen dúbida análogos a aqueles cuxas ruínas
aínda subsisten na meseta iraniana. En calquera caso, Persia, Iraq, Exipto e
China considéranse o berce do aproveitamento da enerxía do vento.
Un estudo sobre pneumática de Herón de
Alexandría no século III a.C., describe por primeira vez unha máquina eólica de
eixo horizontal de catro pas en forma de cruz que accionaba unha bomba de aire
para alimentar as frautas dun primitivo órgano.
En calquera caso, até o século IX non é
posible atopar un documento histórico irrefutable no que se faga mención ao uso
dos muíños de vento como práctica xeneralizada. Este documento é o Libro de
Enxeños Mecánicos, dos irmáns Banu Musa, datado no ano 850.
A difusión do muíño de vento como
máquina capaz de producir enerxía mecánica segue dúas canles ben diferentes: o
primeiro, coa civilización islámica, ocupa todo o Mediterráneo e chega até a
metade sur da Península Ibérica; o segundo parte do triángulo formado por
Bretaña, Inglaterra e os Países Baixos.
Os muíños de vento aparecen na Idade
Media (séculos XII e XIII) en Italia, Francia, España e Portugal. Algo máis
tarde localízanse en Alemaña, Países Baixos e Inglaterra. Atópanse documentados
muíños de vento en Lisboa (1182), Alcobaça (1262), e Évora (1303), e desde o
ano 1350 utilizábanse muíños de vento con catro aletas dispostas en cruz para a
desecación dos polders holandeses. Tamén
utilizábanse xa nestas datas para extraer o aceite de noces e grans, serrar
madeira, transformar trapos vellos en papel, preparar colorantes en po e
elaborar pólvoras.
Pode entón dicirse que, aínda que o
aproveitamento da enerxía eólica data das épocas máis remotas da humanidade, é
a partir dos séculos XII e XIII cando empeza a xeneralizarse o uso dos muíños
de vento para a elevación de auga e a moenda de gran, baseados en deseños moi
rudimentarios que, con diversas melloras, especialmente nos sistemas de
regulación e orientación, manteranse até ben entrado o século XIX.
Nunha publicación europea de 1724
detállase o proxecto dun aeromotor que arrastra unha bomba de pistón por medio
dun cegoñal. Pero este enxeño houbo de esperar até 1870, cando aparece no
continente americano e do que retorna a Europa e implantase e difunde desde
1876 co nome de “muíño americano”, un dos máis importantes avances na
tecnoloxía do aproveitamento do vento, utilizado para bombeo de auga
practicamente en todo o mundo e cuxas características haberían de sentar as
bases para o deseño dos modernos xeradores eólicos.
Coa introdución da máquina de vapor
cara a 1774, a crecente demanda de enerxía oriéntase ós procesos termodinámicos
baseados no consumo de combustibles fósiles, caracterizados polo incremento no
factor de escala, a garantía de utilización e a liberdade de localización
territorial, fronte á servidume asociada á utilización da auga e do vento,
necesariamente vinculada a unha localización favorable, fose as beiras dos ríos
ou as zonas ventosas.
O desenvolvemento dos muíños de vento
interrómpese coa revolución industrial e a utilización masiva do vapor, a
electricidade e os combustibles fósiles como fontes de enerxía motriz. Os
muíños eléctricos pronto viñeron substituír ós muíños fariñeiros accionados
pola forza do vento, do mesmo xeito que a aqueles outros que eran accionados
pola auga dos ríos ou do mar.
Na década de 1970, coincidindo coa primeira
crise do petróleo, iníciase unha nova etapa no aproveitamento da enerxía do
vento. A aplicación das modernas tecnoloxías (en especial, as desenvolvidas
para a aviación) deu como resultado a aparición dunha nova xeración de máquinas
eólicas, moi perfeccionadas e cuns rendementos que permiten a súa explotación
con criterios de rendibilidade económica en zonas de potencial eólico
significativo.
A diferenza dos antigos muíños de
vento, utilizados fundamentalmente para o bombeo de auga e a moenda de gran, a
práctica totalidade das modernas instalacións eólicas oriéntanse cara á
produción de enerxía eléctrica, pola facilidade para a manipulación e
transporte deste tipo de enerxía e pola súa versatilidade nas aplicacións.
Descrición Xeral do Entorno:
Construcción:
Abandono:
Deixou de traballar como taller pirotécnico contra 1953.
Descrición:
O muíño
de vento de José Domingo Millarengo, citado por Begoña Bas (1990) como muíño de
vento da Cruz do Pouso en Neda, fora construído a finais do século XIX, cara a
1888 consonte lembra a súa neta María Jesús Millarengo (Bas, 1996 e 1998). O
emprazamento elixido, na aba do sueste do Monte de Ancos, cerca da aldea da Cruz
do Pouso e da carreteira que comunicaba Ferrol con Vilalba e Ortigueira, conta
con unha moi boa exposición ós ventos localmente dominantes, o nordés e o
suroeste.
José
Millarengo nacera na relativamente próxima parroquia de Doroña, no termo
municipal de Vilarmaior (A Coruña), nunha familia destacada, propietaria de
muíños de cereal, serradoiros e mesmo dun muíño papeleiro. José e os seus
irmáns Manuel e Francisco marcharan de novos da casa familiar, e acabarían por
asentarse na Cruz do Pouso. Pasado algún tempo Francisco abriría unha fundición
na que tamén construía carros coa axuda dos seus irmáns, mentres que Manuel
montaría un taller pirotécnico (aparece en 1888 como mestre polvorista) ó que
José (rexistrado en 1892 como comerciante de ferros) ía de incorporarse contra
1893.
O muíño,
acaroado á parede leste dun edificio rectangular empregado como taller de
moenda e pequeno almacén era unha parte do conxunto das instalacións do taller
pirotécnico, nas que se incluían o almacén de materias primas, os talleres de
elaboración dos fogos e a casa vivenda co almacén de produtos fabricados.
A
construción foi realizada en cachotería miúda, recebada e caleada, de 65
centímetros de espesor, cunhas medidas interiores de 6,7 x 4,9 metros. A torre
do muíño vai incrustada na parede de levante, cunha planta circular de un metro
vinte de diámetro interior e unha altura sobre o chan de sete metros. A parede
da torre vai aumentando o espesor do metro do pe ós corenta e cinco centímetros
do tope, co resultado dunha sólida figura troncocónica.
As
aspas, de madeira, ían suxeitas a un eixe co seu engrene, colocados nun soporte
de ferro afirmado no tope da torre que mantiña tamén o eixe vertical que
transmitía o movemento xiratorio ó engrenaxe do pe do muíño, que á súa volta
engrenaba coa roda de arrastre do eixo horizontal no que, xa dentro do taller,
xiraban as diferentes poleas de transmisión do movemento á maquinaria. Tanto os
engrenes como os eixes e os soportes do sistema de transmisión foran
construídos en ferro na fundición e taller de Francisco.
O eixe
motriz do taller dispuña de dúas poleas de ferro e dúas poleas de madeira, que
accionaban a medio de correas ó muíño de moer o xofre (dúas pedras de gra), á
peneira para o carbón e o xofre moídos, e a roda de arrastre das levas de bater
ó antimonio nos morteiros ou píos de pedra asentados no chan.
Ademais
da porta de entrada na parede de poñente, o taller contaba con dúas ventás na
parede norte e unha na sur. A cuberta sería de tella do país sobre tramado de
madeira.
O
propietario e construtor do muíño da pólvora morrería con trinta e sete anos
nunha explosión ocorrida o vinte de agosto de 1897. O negocio continuaría da
man da súa viúva e o seu fillo Víctor, que tiña daquela catorce anos. Neste
segundo período a sona do taller pirotécnico de Millarengo espallaríase por
toda á comarca pola gran calidade dos seus produtos de foguetería. Víctor
Millarengo morría no ano 1953 e o taller sería entón abandonado.
Na
década do 2000 unha neta do fundador, dona María Jesús Millarengo faríase cargo
do antigo complexo pirotécnico coa intención de conservar o mellor posible os
restos daquela industria, convertendo as instalacións en un negocio hostaleiro
na modalidade de casa de turismo rural.
Tempo de uso:
Sistema de produción:
A distribución non uniforme da enerxía absorbida
pola atmosfera e a consecuente formación de gradientes térmicos, é a causa
primaria do movemento das masas de aire e por tanto, orixe da enerxía eólica,
ou enerxía do vento.
A radiación solar, absorbida
irregularmente pola atmosfera, dá lugar a masas de aire con diferentes
temperaturas e por tanto, diferentes densidades e presións. Estas masas de
aire, ó desprazarse desde as altas cara ás baixas presións, dan lugar ó
fenómeno meteorolóxico coñecido como vento.
Coa designación xenérica de enerxía eólica
alúdese á enerxía do vento, asociada ás masas de aire que se desprazan sobre a
superficie terrestre como resultado da combinación de certos fenómenos
termodinámicos que ocorren na atmosfera cos efectos inerciais que se derivan do
movemento do planeta.
Por conseguinte, podería entenderse
como aproveitamento dos recursos eólicos calquera forma de aproveitamento da
enerxía do vento, dos que existen non poucos exemplos: dende a navegación a
vela á dispersión de contaminantes atmosféricos. Con todo, é costume agrupar
baixo tal designación a conversión da enerxía do vento en enerxía mecánica, e
emprégase este termo cada vez con máis frecuencia para referirse á conversión
da enerxía do vento en enerxía eléctrica.
Ó actuar sobre as pas do muíño de
vento, as masas de aire en movemento ceden ó mecanismo parte da súa enerxía
cinética e obrígano a virar ó redor do seu eixo, proporcionando así unha
enerxía mecánica de rotación que pode despois aplicarse a distintos fins, como
facer virar un muíño, accionar unha bomba, mover unha serra, ou arrastrar unha
dínamo ou un alternador para producir enerxía eléctrica.
Nos muíños de vento construídos en
Galicia para moenda de cereais, as aspas están dispostas sobre un eixo
horizontal, polo que hai que transferir o xiro mediante unhas engrenaxes a un
eixo vertical, que é o que acciona a moa xiratoria. Ademais, o conxunto das
aspas pode virarse a vontade do muiñeiro para orientalas enfrontadas ó vento da
mellor maneira para o aproveitamento enerxético.
Nalgún caso, como ocorre cos existentes
en Catoira, os muíños foron construídos co eixo na dirección dos ventos
dominantes no seu emprazamento e sen posibilidade de orientación, dotándoos por
iso de pas en ámbolos dous extremos para aproveitar os ventos principais e os
seus opostos, que son os que alí sopran habitualmente.
No caso do muíño da Cruz do Pouso as
pas eran únicas e fixas, orientadas para recibir ós ventos predominantes e
virando sempre no mesmo sentido. Neste caso a enerxía do vento aplicábase para
a moendo, o peneirado e o esmagado, sendo o resto do proceso o mesmo empregado
na elaboración estritamente manual das pólvoras.
Trala moenda e peneirado do carbón, o
xofre e o salitre, por separado, pésanse as cantidades precisas de cada un e
mestúranse coidadosamente remexéndoos cunha pouca auga, preparando unhas bolas
que déixanse a secar nunhas táboas. Xa secas esfaragúllanse as bolas nunha
peneira e arrólanse nun pandeiro, co que as faragullas vanse convertendo en
grans máis ou menos grosos consonte o tempo do arrole.
Prepáranse despois os foguetes, facendo
por separado as subidas (a impulsión), os cartuchos (o explosivo), e as mechas.
Móntanse os tiros xuntándoos en foguetes de un dous ou tres estalos e por
último ármanse tanto as bombas coma os foguetes póndolles a vara. Son outros
tamén os produtos que elabora o fogueteiro, como as luces, as retretas, as
rodas de fogo ou as madamitas. Xa que non se pretende facer un tratado de
foguetería, mire o curioso as descricións nos oportunos tratados.
Actividades laborais:
Emprego:
Materias Primas:
Xofre, carbón de madeira, salitre, nitrato potásico,
clorato potásico, antimonio (substituído despois por selenita de aluminio).
Produtos Elaborados:
Pólvora negra, pólvora cloratada, pólvora fulminante e
produtos varios de foguetería.
Distribución e comercialización:
Referencias Bibliográficas:
Bas López, B., 1991, Muiños
de marés e de vento en Galicia, Catalogación Arqueolóxica e Artística de
Galicia do Museo de Pontevedra, A Coruña: Fundación Pedro Barrié de la Maza. DL
PO-216-1991. ISBN 84-87819-13-3.
Bas López, B., 1996: “Fireworks for the community: the
use of windpower ans simple techniques in Galicia”, Gunpowder: the history of an international technology, Brenda J.
Buchanan (ed.), Bath: Bath University Press.
Bas López, B., 1997, “Recursos y técnicas en los molinos de Galicia. Una
síntesis de las tipologías”, Primeras
Jornadas Nacionales sobre Molinología, Organizadas por
Bas
López, B., 1998, “El molino de viento de Neda: un caso excepcional en la
elaboración de la pólvora”, Revista de Neda: anuario cultural do Concello de
Neda, nº 1, dir. Manuel Pérez Grueiro, Concello de Neda,
Neda, Coruña, p. 109-117. ISSN
1139-1154.
Cádiz Deleito, J.C., 1992, Molinos de viento. Historia de las máquinas eólicas, ilustraciones
de Juan Ramos Cabrero, Empresa Nacional de Electricidad S.A. (ENDESA),
Tabapress, Madrid. ISBN
84-7952-096-5.
Caro Baroja, J., 1952, "Disertación sobre los
molinos de viento”, Revista de Dialectología y Tradiciones Populares,
VIII, Madrid, pp. 212-366.
Caro Baroja, J., 1995, Historia de los molinos de viento, ruedas hidráulicas y norias,
Instituto para
Lara Coira, M., 1990, Las energías renovables y Galicia, Gestión Energética de Galicia,
Santiago de Compostela. ISBN
84-404-8124-1. Existe una edición de 1991 en gallego, titulada As enerxías renovables e Galicia, Gestión Energética de Galicia, Santiago de
Compostela. ISBN
84-604-0101-4.
Llano Cabado, P. de, 1983, Arquitectura popular en Galicia: a casa mariñeira, a casa das agras, a
casa do viño, as construccións adxetivas, Introdución xeográfica de Augusto
Pérez Alberti, Colexio Oficial de Arquitectos de Galicia, Santiago de
Compostela. ISBN 84-85665-08-2.
Lorenzo Fernández, X., 1962, “Etnografía: cultura material. Os oficios: Fogueteiros”, Historia de Galiza, Ramón Otero Pedrayo
(dir.), Buenos Aires: Editorial Nós, vol. II, O home-II, p. 601-607.
Lorenzo Fernández, X., 1983. “Fogueteiros”, Os oficios, Biblioteca Básica da Cultura
Galega, Vigo: Editorial Galaxia, p. 194-202. DL VG-18-1983. ISBN 84-7154-425-3.
Soraluce Blond, J.R., y Fernández Fernández, X.
(directores), 1999, Arquitecturas da
provincia da Coruña, vol VIII. Comarca de Ferrol I: Ares, Fene, Mugardos, Narón
e Neda, A Coruña: Deputación Provincial da Coruña. DL 937/1997. ISBN
84-95335-07-7.
Índice de mapas e planos:
Localización no Mapa Topográfico Nacional 1:25.000: Folla 7-III Neda //
Datum europeo 1950 (ED50) Fuso 29 // X 571.034,91 m
/ Y 4.818.023,88 m